Nəzərlər bu gün keçiriləcək “OPEC+” toplantısındadır: Hansı qərarlar qəbul ediləcək?
11:55 / 02.02.2022
394
Neft bazarı iştirakçılarının nəzərləri bu gün keçiriləcək "OPEC+” toplantısına yönəlib. "OPEC+” növbəti ay üçün gündəlik neft hasilatında dəyişikliyi müzakirə edəcək. İri investisiya şirkətlərinin açıqlamasına görə neft qiymətlərinin bir qədər düşməsi üçün hasilatın xeyli artırılması lazımdır.
Sfera.az xəbər verir ki, "OPEC+” böyük ehtimalla bu dəfə də kənar tövsiyələrə əhəmiyyət verməyəcək və əvvəl müəyyən etdiyi strategiya çərçivəsinə uyğun olaraq gündəlik hasilatı 400 min barrel artıracaq.
Məlumatlara əsasən, hazırda qlobal neft bazarında tələb təklifdən çoxdur. Bu səbəbdən neft qiymətləri ötən il 55 faiz artıb.
2022-ci ildə də bahalaşma davam edir. Bəzi tanınmış investisiya şirkətlərinin proqnozuna əsasən əgər "OPEC+” hasilatı daha çox artırmasa, 2022-ci ildə "Brent” neftinin qiyməti 100 dollara çatacaq.
Hazırda "Brent” nefti 88-89 dollara, Azərbaycanın ixrac etdiyi neft isə 93-94 dollara satılır.
Vasif
Sfera.az
