Avtomobil idxalı niyə artıb? – Ekspert səbəbləri açıqladı
15:06 / 25.01.2022
775
Dövlət
Gömrük Komitəsi tərəfindən 2021-ci il ərzində ölkəyə 84 596 nəqliyyat vasitəsinin
idxal olunduğu bildirilib. Bu göstərici 2020-ci ildə 49 431-ə bərabər idi.
Maraqlıdır, nəqliyyat idxalında 70 faizlik artım nədən irəli
gəlir?
Mövzu ilə
bağlı Sfera.az-a danışan nəqliyyat məsələləri üzrə ekspert Eldəniz Cəfər
Qarabağda quruculuq işləri ilə əlaqədar olaraq nəqliyyat idxalının yüksəldiyini
deyib:
"2021-ci
ildə Azərbaycana gətirilən nəqliyyat vasitələrinin sayının artması iqtisadiyatımız
üçün müsbət haldır. İqtisadiyyat böyüdükcə, nəqliyyat vasitələrinə tələb də
artır. Bu məsələdə işğaldan azad olunmuş ərazilərə geri dönməyimiz də öz rolunu
oynayır. Artıq Qarabağda quruculuq işləri görülür və bu səbəblə də nəqliyyat
vasitələrinin idxalının sayında artımın olması gözləniləndir. 2011-2014-cü illərdə
il ərzində Azərbaycana 100 000 nəqliyyat
vasitəsi idxal olunurdu. 2021-ci ilin
göstəricilərinin 2020-ci ildən yüksək olmasına səbəb postpandemiya dövründə
yaşamağımızdır. Buna görə də nəqliyyat vasitələrinə tələbat artıb. Azərbaycan əhalisinin
sayı 10 milyonu keçib, lakin ölkədə mövcud olan avtomobillərin sayı təxminən 1
milyon 500 ədəddir. Bunun da 1 milyon 300 mini minik avtomobilləridir. Bu isə əhali
sayına nisbətdə böyük deyil. Əgər bu rəqəm 3 milyon olsa idi, o zaman biz
avtomobillərin sayının artıq olduğunu deyə bilərdik”.
Ekspert
hibrid və elektrik avtomobillərin idxalının daha da artacağını deyib:
"Ölkəmizə
idxal olunan avtomobillərin əksəriyyəti köhnə, ömrünü başa vurmuş avtomobillərdir.
Bizim sahibkarlar ölkəyə təzə avtomobillərin gətirilməsinə çalışmalıdırlar. Ölkədə
yeni avtomobillərin alınması üçün vətəndaşların stimullaşdırılması həyata
keçirilməlidir. Statistikaya baxanda
görürəm ki, insanlar indi daha çox ekoloji təmiz avtomobillərə üstünlük verirlər.
2022-ci ildən bu avtomobillər gömrükdə əlavə
dəyər vergisindən azad olunub. Bu da o deməkdir ki, ölkəyə hibrid və elektrik
avtomobillərin idxalının sayı artacaq, insanlar bu tip avtomobilləri daha çox
istismar edəcək”.
