Mərkəzi Bank faizləri artırmağa davam edəcək
12:47 / 21.01.2022
760
Azərbaycan Mərkəzi Bankı ötən ilin sentyabrından faiz dərəcələrinı artırır. Faiz dərəcələrinin artırılması qərarına təsir edən əsas amil isə inflyasiya səviyyəsinin yüksəlməsidir.
Avqustda 6,7 faiz olan illik inflyasiya sentyabrda 8,5 faizə, dekabrda 12 faizə çatıb. Buna görə də Mərkəzi Bank 6,25 olan uçot dərəcəsini sentyabrda 6,5-ə, oktyabrda 7-yə, dekabrda 7,25-ə qaldırıb.
Sfera.az bildirir ki, 2022-ci ilin əvvəlində də inflyasiya səviyyəsinin yüksələcəyi ehtimalı böyükdür. Çünki ötən ilin yanvarından iyul ayına qədər illik qiymətlər aşağı sürətlə artıb. Yanvarda 3,3 faiz olan illik qiymət artımı iyunun sonunda 4,7 faizə çatıb.
2021-ci ilin əvvəli ilə müqayisədə 2022-ci ilin ilk aylarında qiymət səviyyəsi çox yüksək olduğundan cari ilin yanvarından may ayının sonuna qədər istehlak qiymətləri indeksinin bir qədər də yüksələcəyi ehtimalı var. Buna cavab olaraq Mərkəzi Bank davamlı şəkildə faizləri artırmaq məcburiyyətində qalacaq.
Mərkəzi Bank bu il 8 dəfə faiz dərəcələri ilə bağlı qərar qəbul etməlidir. Bunlardan ilki yanvarın 28-də baş verəcək. Daha sonra martın 18-də və aprelin 29-da faiz dəhlizinin parametrlərinə baxılacaq. İnflyasiya səviyyəsinin yüksəlməsi şəraitində böyük ehtimalla ilk 2, hətta 3-cü toplantıda faizlər artırılacaq.
Ötən il dünyanın bütün regionlarında qiymətlərdə ciddi artım baş verib. Açıqlanan məlumatlar göstərir ki, qiymət artımları uzunmüddətlidir və Mərkəzi Banklar pul-kredit siyasətini sərtləşdirmədiyi təqdirdə inflyasiya səviyyəsinin tezliklə enməsi real deyil. Bununla əlaqədar olaraq 2022-ci ildən bir çox ölkənin mərkəzi bankı, o cümlədən ABŞ, Avropa İttifaqının, Çinin, Yaponiyanın, Rusiyanın mərkəzi bankları faizləri artıracaq. Azərbaycanda da Mərkəzi Bankın eyni addımı atacağı ehtimalı böyükdür.
Qeyd edək ki, mərkəzi banklar faizləri artıranda kommersiya banklarının mərkəzi bankdan aldığı kreditlər bahalaşır. Eyni zamanda depozit və əmanət faizləri də yüksəlir. Bu vəziyyətdə kommersiya banklarının cəlb etdiyi vəsaitlərə çəkilən xərc artdığından ölkədə kredit faizləri yüksəlir, nəticədə kredit sifarişləri azalır. Kredit sifarişlərinin azalması isə iqtisadiyyatın, həmçinin əhalinin alıcılıq qabiliyyətini, yəni tələbi zəiflədir.
Beləliklə, mərkəzi bankların faizləri artırması onunla nəticələnir ki, ölkədə iqtisadi aktivlik zəifləyir və qiymət artımları səngiyir. Dolayısı ilə artan faizlər inflyasiyanı cilovlamağa imkan verir.
Vasif
Sfera.az
