“Sev”lə məşhurlaşan Şeyla ABŞ-da “Amazon”da çalışır - VİDEO

- Sənətdən uzaqlaşmağıma çox səbəb var idi, zamanla onların hamısı musiqiyə olan marağımı azaltdı. Ən əsası, təəssüf ki, Azərbaycanda şou-biznesin adlandırılan sənayenin hələ də peşəkar qurulmuş mexanizmi yoxdur. Los-Ancelesdə yaşayaraq, bu sənayenin nə qədər böyük və ciddi olduğunu indi yaxşı başa düşürəm. Azərbaycanda isə o vaxt ciddi menecer, prodüser, "imagemaker” komandası yığmaq və ən əsası musiqi istehsalı ilə məşğul olan şirkət tapmaq mümkün deyildi - peşakar kadrlar olmadığı halda, hər şey həvəskar səviyyədə baş verirdi.

- Xeyr. Şükürlər olsun ki, ümumiyyətlə, mən əməllərimdən peşman olmayan və keçmişə geri dönməyən insanlardanam. Musiqi həmişə mənim hobbim olub və "Sənsiz” albomum işıq üzü görəndən sonra məni maraqladıran başqa sahələrə keçdim.

- Düşünürəm ki, dinləyicilərim bunu biləndə təəccüblənəcəklər. Belə ki, müğənnilik etdiyim zaman, ondan öncə və sonra ticarət və biznesin müxtəlif sahələrində çalışmışam. 2002-ci ildən, yəni Vətənimdən tam köçənədək Bakıda şirkətlərin birində çalışmışam. Mənim mühacirət hekayəm 2009-cu ildə ABŞ-a köçməyimlə başladı. Bu illər ərzində isə beş dəfə ixtisasımı dəyişmişəm. Hazırda dünyanın ən böyük onlayn pərakəndə satış şirkəti olan "Amazon”un bulud saxlama və hesablama texnoloji budaq şirkəti "Amazon Web Services”də (AWS) marketinq üzrə layihə meneceri kimi çalışıram.

- Məncə, bu ən maraqlı sualdır. Əminəm ki, hər uğurlu layihə üçün iki ən əsas komponent - yaradıcı ilham və ictimai tələbin birləşməsi vacibdir. Budəfəki layihəm də həmin hallardandır. Özüm-özümə dəfələrlə deyirdim ki, buna vaxtım yoxdur, lakin məqsəd və ilham artıq neçə ildir məni rahat qoymurdu. Xaricə köçəndən bir neçə il sonra anladım ki, Azərbaycan mühacirlərini, yəni bizi birləşdirən bir dənə də olsun səviyyəli mahnı yoxdur. Məhz buna görə də özüm bu işin öhdəsindən gəlməyi qərar verdim (gülür-red.) Lakin, oxucuları çaşdırmamaq üçün onu da qeyd etmək istərdim ki, mən on ildən artıq başqa ölkədə başqa maraqlarla yaşadığıma görə böyük səhnəyə qayıtmağı planlaşdırmıram.

- Bakıda mənim gözəl yaradıcı kollektivim var! Bizi əməkdaşlıqla yanaşı, çoxillik dostluq birləşdirir. "Bakı payızı” müsabiqəsinin laureatı Kamran mənim sinif yoldaşım olub. Həyat elə gətirdi ki, musiqi dünyasında da görüşdük. Mahnının ideyasını düşünərkən layihəyə mütləq kişi səsi əlavə etmək qərarına gəldim. Ona görə ki, mühacirətin də iki baxışı var - kişi və qadın. Kamran da mənim kimi bir neçə ildir Azərbaycandan kənarda yaşayır. Beləliklə, ona müraciət etdim və sözsüz ki, uşaqlıq dostumu yenə görüb birgə işləmək yaradıcılığıma ayrı bir ləzzət verdi. "Sev” mahnısının bəstəkarı Günel Əlizadə, demək olar ki, ifa etdiyim mahnıların əksəriyətinin müəllifidir. Yeni mahnımın ərsəyə gəlməsində əməyi olanlardan biri də Rüstəm Rzayevdir. Onunla ilk əməkdaşlığımız 2000-ci ildə reper Elşad Xose ilə yazdırdığımız "Aylı gecə” mahnısı üzərində çalışarkən olub. Sonralar isə "Sənsiz” albomumun bütün "mixing” işlərini Rüstəmə həvalə etmişdim.

- Əslinə qalsa, gördüyünüz kadrlar adi telefonla çəkilib və bizim gündəlik həyatımıza aiddir. Aeroport, studiyada çəkilən bütün kadrlar məhz bu il Bakıya gəlişimiz zamanı çəkilib. Klipin məqsədi hər bir Azərbaycan mühacirinin gündəlik həyatından Vətənə - şirin xatirələrə səyahətini nümayiş etdirməkdir. Biz hər il Vətənimizə, ailə və dostlarımıza baş çəkir, Azərbaycana sonsuz emosional və mədəni bağlıliq hiss edirik. Harada olsaq da, Vətən güc yerimizdir! Mənə bu hekayəmizi tamaşaçılara çatdırmağa, montaj işini öz boynuna götürən "Məktəb illəri”, "Tut ağacı” və "Sev” kimi məşhur kliplərin rejissoru, çoxdan əməkdaşlıq etdiyim sənətkar Aqil M. Quliyev kömək etdi.

- Şəxsi həyatımdan çox danışmağı xoşlamıram, eyni səbəbdən də bu məqama "şəxsi” deyilir (gülür-red.). İki övladım var.

- Çox sağ olun!