"Ermənistanla seperatçılar arasında uçurum bir az da dərinləşəcək, Azərbaycan isə..." - Deputat
Siyasət
14:52 / 29.12.2021
519
"Paşinyan və onun ətrafında olan komanda 30 il ərzində bütün ciddi cəhdlərinin yersiz, ədalətsiz olduğunu dərk etməyə başlayıb. Azərbaycan öz torpaqlarına sahib çıxmalı idi və çıxdı da”.
Bunu Sfera.az-a açıqlamasında Milli Məclisin deputatı Elman Məmmədov deyib. O bildirib ki, Qarabağda olan separatçı cinayətkarların ayaqları bir az yer alır və bunun səbəbi var:
"Onlara kənardan ümid verən qüvvələr mövcuddur. Fransanın prezidentliyə namizədi Valeri Perkesin Xankəndiyə səfərindən hələ bir neçə gün keçib, indi Rusiya Dumasından Vitali Milonov ora gəlib. Yəni bütün bunlar onlara ümid verir ki, "deyəsən, biz önəmliyik və müdafiə edənlərimiz var, murdar əməllərimizdə burada yaşamağa davam edəcəyik". Kənardan fitva verən qüvvələr olmasa, nə Qarabağdakı cinayətkarlar o iddiada olar, nə də orada yaşayarlar, çıxıb gedərlər. Mən Rusiya-Azərbaycan münasibətlərinə soyuqluq gətirib, kölgə salmaq istəmirəm, lakin həqiqəti deyəcəm və gizli bir şey də yoxdur. Bu gün ərazimizdə yerləşən Rusiya hərbi kontingenti onların bir nömrəli ilhamvericisidir, təhlükəsizliklərini təmin edib öz cinayətkar fəaliyyətlərini davam etdirməsinə şərait yaradırlar”.
Müsahibimiz qeyd edib ki, getdikcə Ermənistanla seperatçılar arasında narazılıq və uçurum bir az da dərinləşəcək:
"Artıq Ermənistanda sağlam düşüncəli qüvvələr başa düşürlər ki, 30 ildə seperatçıların hesabına özləri pis günə düşüblər, dünyadan təcrid olunmuş vəziyyətdə qalıblar, iqtisadiyyatları çöküb. Qarabağda iki quldur – Serk Sarkisyan və Robert Köçəryan bunların başına ip salıb oynadıb, kapitalı talayıb pis vəziyyətə qoyublar. Əhali bunu dərk edib nəticə çıxarır. Onların yeganə çıxış yolunun Türkiyə və Azərbaycanla mehriban qonşuluq şəraitində yaşamaq, əməkdaşlıq etmək olduğunu anlayırlar. Ona görə də rəsmi İrəvanla Qarabağdakı seperatçı cinayətkarlar arasında narazılıqlar getdikcə çoxalacaq və bu da bizim xeyrimizədir”.
Günay Rəsulqızı
Sfera.az
