"Kreml İrəvan-Ankara münasibətlərinin normallaşmasında moderatordur" – Şərh
16:06 / 27.12.2021
975
Türkiyə xarici işlər naziri Mövlud Çavuşoğlu
Türkiyə və Ermənistanın münasibətlərin nizamlanması üzrə xüsusi nümayəndələrin
ilk görüşü Moskvada keçirilə biləcəyini qeyd edib. Çavuşoğlunun sözlərinə görə,
Ermənistanın da belə bir istəyi var.
Maraqlıdır, indiki halda tərəflərin ilk görüş
yeri kimi Moskvanı seçməsinin səbəbi nədir?
Mövzu ilə bağlı Sfera.az-a danışan politoloq
Qabil Hüseynli deyib ki, görüşün Moskvada keçirilməsi Ankaradan çox İrəvanın istəyidir.
"Hesab edirəm ki, bunda qeyri-adi nəsə yoxdur.
Rəsmi İrəvan Ankara ilə münasibətləri bərpa etmək istəsə də çəkindiyi məqamlar
var. Bu mənada deyə bilərik ki, Ermənistan özünü ən təhlükəsiz hiss etdiyi yerdə,
yəni görüşün Rusiyada keçirilməsini istəyib. Prinsip etibarilə məkanın Türkiyə
üçün elə də bir fərqi yoxdur. Çünki sərhədlərin açılması, münasibətin
normallaşması Türkiyədən çox Ermənistanın istəyidir. Yəni Türkiyənin nə çəkindiyi,
nə də itirə biləcəyi heç nə yoxur”.
Politoloq hesab edir ki, Azərbaycan-Ermənistan
münsabitələrinin normlaşmasında olduğu kimi, Türkiyə-Ermənistan münasibətlərinin
normallaşmasında da Kreml moderatorluq edə bilər:
"Görüşün Moskvada keçirilməsi Rusiyanın
prosesdə yaxından iştirak etdiyinə dəlalət edir. Türkiyə-Ermənistan münasibətlərinin
normallaşması Rusiya üçün də məqbuldur. Bu mənada Kremlin moderatorluğu
prosesin sürətlənməsinə töhfə verə bilər. Rusiya özü də 3+3 formatında iştirak edir. Bu
mənada formatın digər iki üzvünün münasibətlərini normallaşdırması Kreml üçün də
vacib məsələdir".
