Azərbaycanlılar pulu niyə “yastıq altında” saxlamağa üstünlük verir? – “Banklara etimad yoxdur...”

Mövzu ilə bağlı Sfera.az-a açıqlama verən iqtisadçı Natiq Cəfərli deyib ki, pandemiya dövründə 4 bankın bağlanması bank sektoruna olan güvəndə ciddi problem yaradıb:

"Bundan öncə də bir neçə bankın bağlanmasının şahidi olmuşuq. Təbii olaraq, vətəndaşların bir qismində bankda vəsaitlərin saxlanması ilə bağlı suallar yaranıb. Həmçinin zaman-zaman bağlanan banklarda depoziti olan vətəndaşlar onların geri alınması istiqamətində ciddi maneələrlə rastlaşıblar, vaxt itiriblər, əsəbləri gərilib. Söhbət 10 minlərlə vətəndaşdan gedir, çünki son illəri götürsək, bağlanan bankların sayı 10-dan çoxdur. Ciddi izahı olmadan belə addımların atılması bank sektoruna olan güvəni zədələyən amildir. Güman ki, son zamanlar vətəndaşların bir qismi obrazlı desək, yastıq altında pul saxlamağa daha çox üstünlük verirlər”.

"Bu, dollarlaşmanın qarşısını almaq üçün atılan addım idi, insanları manata keçidə, onunla depozitə qoymağa təşviq edirdilər. Dollarla depozit faizi illik 1-1,5 faizdir, yəni 10 min dollar qoysan, 100 dollar qazanırsan. Vətəndaşlar riski gözə alıb 100 dollara görə valyutasını banklarda depozitə qoymaq istəmir və valyuta ilə olan depozit fazilərinin aşağı olması da ciddi problemdir. Nəticə etibarilə, vətəndaşlar vəsaiti gözlərinin qarşısında  saxlamağa üstünlük verirlər, bu da zaman-zaman oğurluq hallarının artmasına gətirib çıxarır”.

 

"Məsələn, Türkiyədə lirə ilə bağlı nə qədər problem olsa da, banklar yerli televiziyalarda ən çox reklam satan sahələrdən biridir. Onlar insanları həm depozitə, kreditə və başqa əməliyyatlara təşviq edirlər. Bizdə banklarla bağlı ciddi kampaniya da yoxdur, insanlara pozitiv mesajlar az verilir. Düşünürəm ki, birinci növbədə bu məsələ həllini tapmalıdır. İkincisi isə, valyuta ilə olan depozitlərin faiz dərəcələrinin bu qədər aşağı olması doğru deyil. Bu istiqamətdə də Mərkəzi Bank və Banklar Assosiasiyasının birgə addımlar atmasında fayda var”.