“Ermənistan saxta mina xəritələri verməyə davam edərsə…” – Deputatdan TƏKLİF
Siyasət
17:36 / 10.12.2021
1578
Ölkə başçısı İlham Əliyev bir neçə dəfə vurğulayıb ki, Ermənistanın Azərbaycana verdiyi mina xəritələri saxtadır. Təəssüf ki, zaman-zaman vətəndaşlarımızın minaların partlaması nəticəsində həlak olduqları haqqında məlumatlar oxuyuruq.
Bu baxımdan maraqlıdır, Azərbaycan erməni diversantların azad olunması əvəzinə mina xəritələrinin verilməsi prinsipindən imtina edə bilərmi?
Bununla bağlı Sfera.az-a açıqlama verən Milli Məclisin deputatı Azər Badamov xatırladıb ki, bu günə qədər 200-ə qədər vətəndaşımız minaya düşərək ya həlak olub, ya da sağlamlığını itirib.
Müsahibimiz qeyd edib ki, torpağın altındakı minalar gözəgörünməz düşməndir və hər zaman insan həyatı üçün təhlükədir:
"Azərbaycan dövləti öz humanistliyini nümayiş etdirərək saxlanılmış diversantları zaman-zaman Ermənistana qaytarır. Ermənistan da özünü dünyaya "sülhpərvər” kimi göstərmək məqsədilə, mina xəritələrini Azərbaycana təhvil verir. Çox təəssüf ki, Ermənistanın bizə verdiyi minalanmış sahələrin xəritələrinin 25%-i düz çıxır. Ermənilər burda da saxtakarlıq edib öz düşmən niyyətini ifadə etməkdə davam edirlər”.
Deputat bildirib ki, ermənilərin bundan sonrakı hərəkətlərində heç vaxt səmimilik ola bilməz və qərarları da onların hərəkətlərinə adekvakt şəkildə qəbul etməliyik:
"Məsələn, bir sahənin xəritəsini verirsə və orada uyğunsuzluq görürüksə, o əraziyə, həbs olunmuş və ya saxlanılmış erməniləri gətirib gəzdirməliyik. Elə etməliyik ki, qoy özləri özlərinin basdırdıqları minalara düşüb məhv olsunlar. Düşünürəm belə bir yanaşmanı ortaya qoysaq, ermənilər saxta mina xəritələrini verməkdən çəkinərlər”.
Günay Rəsulqızı
Sfera.az
