Ev almaq istəyənlərə pis xəbər: Gələn ildən qiymətlər yüksələcək

 

Sfera.az bildirir ki, bunu iqtisadçı Eldəniz Əmirov deyib. O qeyd edib ki, buna səbəb bankların depozitlər və əmanətlər üzrə orta faiz dərəcəsinin 8,5%,  illik infilyasiyanın isə 10%-i keçməsidir:

"Sadə dildə desək, əmanətçiyə inflyasiyanın vurduğu zərər bankın ona vəd etdiyi xeyirdən çoxdur. Odur ki, gələn il depozit və əmanət həcmlərinin artım templərinin bu illə müqayisədə azalması gözləniləndir. Çünki insanlar əlində olan pulu evdə saxlasa, ən azı 10% itirəcəyini, banka qoyduğu halda yenə 1-3 faiz itirəcəyini düşünəcək. Buna görə də əmanətlərin ən etibarlı saxlanılması və qorunması üçün dədə-baba üsuluna üz tutanların sayı artacaq. Bu üsul isə vəsaitlərin daşınmaz əmlaka yatırılmasına, daha dəqiq desək, ev alanların sayının artmasına gətirib çıxaracaq. Bu da evlərin qiymət artımına səbəb olacaq ciddi faktordur”.

Ekspert məsələnin müsbət tərəflərindən də söz açıb:

"Tikinti sektorunda canlanma yaranacaq və canlanma kredit portfelində tikinti sektorunun payını artırmaqla real sektora kredit qoyuluşunun həcmini artırmış olacaq. Amma böyük rəsmə baxsaq, əmanət faizləri və infilyasiya faizləri arasındakı əks fərq problemlər yarada bilər. Çünki, indiyə qədər manatla depozitlərin artım tempi kredit borclarının artım tempini üstələdiyindən bank sistemində likvidlik normal hesab edilə bilərdi. Amma qeyd etdiyim səbəbdən depozitlərin artım tempinin istiqamətini dəyişsə, bu bank sektoru üçün ciddi qayğıya çevriləcək”.