Bahalaşma ailələrin aylıq xərcini nə qədər artırıb? – Əhali pulu daha çox bu məhsullara xərcləyir
15:57 / 17.11.2021
1494
Azərbaycanda bu il müşahidə edilən yüksək qiymət
artımı əhalinin adambaşına düşən istehlak xərclərinin artmasına səbəb olub.
İlin əvvəlindən bəri illik bahalaşmanın 3,3 faizdən 10 faizə qədər yüksəlməsi əhalinin
xərclərinin artmasına güclü təsir edib. Bunu rəsmi məlumatlardan da görmək
mümkündür.
Sfera.az bildirir ki, bu ilin yanvarında əhalinin
istehlak bazarında adambaşına xərci 382 manat olmuşdu. Xərcin 167 manatı ərzağın,
149,4 manatı qeyri-ərzaq mallarının, 65,6 manatı pullu xidmətlərin alınmasına
yönəldilmişdi.
Birinci rübdə əhalinin istehlak xərcləri 384
manata yüksəlib. Bunun 173 manatı ərzağa, 145 manatı qeyri-ərzağa, 66 manatı
pullu xidmətlərə sərf edilib.
İlin birinci yarısında istehlak xərcləri 387,7
manata çatıb. Xərclərin 173,8 manatı ərzağın, 149 manatı qeyri-ərzağın, 64,9
manatı pullu xidmətlərin alınmasına gedib.
İlin ilk 10 ayında isə bir istehlakçı orta
hesabla ayda 412,2 manat xərcləyib. Bu qədər pulun 185,7 manatı ərzaq
mallarının, 158,1 manatı qeyri-ərzaq mallarının, 68,4 manatı pullu xidmətlərin əldə
edilməsinə sərf olunub.
Müqayisə göstərir ki, ilin əvvəlindən əhalinin
adambaşına istehlak xərcləri 30,2 manat, 2020-ci ilin eyni dövrünə nisbətən
32,9 manat, bir ailənin xərcləri isə orta hesabla ayda 131,6 manat artıb.
Bu il istehlak xərclərindəki artımın 18,7
faizi ərzaq xərclərinin, 8,7 manatı qeyri-ərzaq, 2,8 manatı pullu xidmətlərə çəkilən
xərcin artması hesabına baş verib.
Ərzaq xərclərinin daha çox artması bu məhsullar
arasında bahalaşmanın daha güclü olması ilə əlaqədardır. Son bir ildə ərzaq
qiymətlərində artım 13,1 faiz olduğundan ərzağa çəkilən xərcdəki artım da daha
böyük olub.
