ABŞ və Rusiya bu ölkəyə eyni anda silah satır
Siyasət
11:16 / 16.11.2021
1192
"İkinci Qarabağ müharibəsi pilotsuz uçuş
aparatlarının üstünlüyünü dünyaya əyani şəkildə nümayiş etdirdi. Polşa və
Ukrayna İkinci Qarabağ müharibəsindən sonra Türkiyədən "Bayraqtar” PUA-larının alınmasına
qərar verdilər. Bu tendensiya davam etməkdədir”.
Sfera.az bildirir ki, bu sözləri "Atlas”
Araşdırmalar Mərkəzinin rəhbəri Elxan Şahinoğlu deyib.
Onun sözlərinə görə, Hindistanın da pilotsuz
uçuş aparatlarına marağı artıb. Hindistanla Çin arasında sərhəd problemi
mövcuddur, Himalay dağlarının ətrafında gərginlik hökm sürür, ara-sıra
toqquşmalar qeydə alınır:
"Hər iki ölkə zaman-zaman bu ərazilərdə hərbi
təlimlər keçirməklə güclərini nümayiş etdirirlər. Bu arada, Hindistanın baş
naziri Narendra Modi ordunun modernləşdirilməsinə qərar verib. Məqsəd quru və
hava qüvvələrini gücləndirməkdir. Bu məsələdə Hindistana ABŞ dəstək verir.
Hindistan, Avstraliya və Yaponiya ilə birgə
ABŞ-ın formalaşdırdığı dördlü blokun üzvüdür. Buna görə də Amerika tərəfdaş
dövlətlərin ordularını gücləndirməyi özünə borc bilir. ABŞ Hindistana hərbi
hava qüvvələrini gücləndirməyə kömək edir. Məhz bu mövzunu müzakirə etmək üçün
Narendra Modi bir müddət əvvəl ABŞ Prezidenti Co Baydenlə Ağ Evdə görüşmüşdü.
Bu görüşdən sonra Hindistanın Amerikadan 30 "Predator” pilotsuz uçuş aparatı
alacağı xəbəri yayıldı. Hindistan bu dronlardan Çinlə sərhədi nəzarət etməyi
planlaşdırır. Yəni bu dronlar kəşfiyyat məqsədlidir. Amerika Hindistana
"Apache” helikopterləri də satıb.
Hindistan Amerika ilə yanaşı Rusiya ilə də hərbi-texniki
əməkdaşlığı genişləndirməyə çalışır. Hindistan Rusiyadan T-90 və T-72 tankları,
Cu-30 hərbi təyyarələri alıb. Bundan başqa Hindistanla Rusiya birə "BrahMos”
raketlərini istehsal edirlər. Hindistan bu raketləri Çinin Tibetlə sərhəd ərazisində
də yerləşdirib”.
Politoloqun fikrincə, Hindistan tək-tük ölkələrdəndir
ki, bir-biri ilə münasibətləri gərgin olan həm ABŞ, həm də Rusiyadan hərbi
texnika alır:
Hərbi ekspertlər Çinin son illərdə hərbi gücünü dəfələrlə artırdığını bildirirlər. Ona görə də Hindistan Çindən geri qalmamağa çalışır. Buna baxmayaraq, Çinin hərbi büdcəsi Hindistanın hərbi büdcəsindən ən azı 3 dəfə çoxdur. Dehli ordunu modernləşdirməklə, yeni hərbi texnika almaqla Çindən geriliyin artmasına imkan vermək istəmir”.
Turan
Rzayev
