Əvvəl "MNTM" QSC, sonra AMEA: 2 milyona yaxın pul... - Tenderlərin yeni favorit şirkəti barədə TƏFƏRRÜAT
16:42 / 12.11.2021
1286
Azərbaycan Milli Elmlər Akademiyasının (AMEA) İşlər İdarəsi elmi müəssisə və təşkilatlara cihaz və avadanlıq alınmasına dair elan etdiyi açıq tenderə yekun vurub.
Dövlət satınalmalarının vahid internet portalında yer alan məlumata əsasən, "Tetra AZ" Məhdud Məsuliyyətli Cəmiyyət (MMC) Azərbaycan Milli Elmlər Akademiyasının (AMEA) elan etdiyi açıq tenderin qalibi olub. Adıçəkilən şirkət AMEA-ya 1,245 milyon manat dəyərində cihaz və avadanlıq satacaq.
Bu "Tetra AZ"ın cari il ərzində qalib gəldiyi ikinci tenderdir. Belə ki, Türkiyənin Azərbaycanda törəmə şirkəti olan "Tetra AZ" bundan öncə 2021-ci ilin fevralın 23-də "Milli Nüvə Tədqiqatları Mərkəzi" Qapalı Səhmdar Cəmiyyətinin (QSC) tenderinin qalibi elan edilmişdi. Həmin müsabiqənin nəticəsinə uyğun olaraq QSC-yə 464,6 min manatlıq elmi tədqiqat cihaz və avadanlığı satılıb.
Bəs son vaxtlar adını tez-tez eşitməyə başladığımız bu şirkət kimə məxsusdur?
Sfera.az bildirir ki, "Tetra AZ" MMC 2013-ci ilin sonlarında Türkiyənin "Tetra Texnoloji Sistemlər Ltd" tərəfindən Bakıda yerli bir Azərbaycan firması olaraq qurulub. Bu şirkət Azərbaycanda, analitik cihazlar, laboratoriya cihazları satır və servis xidmətləri göstərir.
Şirkət İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində qeydiyyata alınıb. Bakı Şəhəri Səbail rayonu, Badamdar Şossesi, Ev 158 A, 2-ci Yaşayış Massivində qeydiyyatda olan şirkətin hüquqi sahibi Eyyub Atabaşdır.
Aysel
Sfera.az
