“Pensiya fondu” gəlirlərini kəskin artıracaq

Sfera.az Hesablama Palatasına istinadən bildirir ki, gəlirlər 5,31 milyard manat həcmində proqnozlaşdırılır. Bu məbləğ 2020-ci ilin icra göstəricisindən 558 milyon manat və ya 11,7%, 2021-ci il üzrə gözlənilən icra göstəricisindən isə 253 milyon manat və ya 5% çoxdur.

Fondun gəlirlərinin sürətlə artımına məcburi dövlət sosial sığorta ödənişlərindəki ciddi artım kömək edəcək. Gələn il gəlirlərin 78,2 faizi sosial sığorta, 21,6 faizi dövlət büdcəsindən transfert, 0,2 faizi sair daxilolmaların payına düşəcək. 

Növbəti ildə gəlirlərinin cari ilin sonuna gözlənilən icra göstəricisi ilə müqayisədə ümumilikdə 253 milyon manat artımı məhz sosial sığorta üzrə gəlirlərin artımı hesabına formalaşacaq.

2022-ci ildə sosial sığorta üzrə gəlirlərin 4,15 milyard manat olacağı proqnozlaşdırılıb. Bu da 2020-ci ilin icra göstəricisindən 595 milyon manat (16,7%), 2021-ci il üzrə gözlənilən icra göstəricisindən isə 411,5 milyon manat (11%) çoxdur. 

Hesablama Palatası bildirir ki, sosial sığorta üzrə proqnozlaşdırılan artım səviyyəsi növbəti ildə ölkə üzrə proqnozlaşdırılan orta aylıq əmək haqqının 5 %-lik artım səviyyəsini üstələyəcək. Qurum hesab edir ki, artımın əsas səbəbi sosial sığorta ödənişləri ilə əhatə olunacaq sığortaedən və sığortaolunların sayının, əmək haqqı fondunun artımı, qeyri-formal məşğulluğun aradan qaldırılması istiqamətində həyata keçiriləcək fəaliyyətlərin daha da dərinləşməsi hesabına mümkün olacaq.