Bahalaşmaya görə Gömrük Komitəsini günahlandırdı: "Yığdığınız hər manat vətəndaşın cibindən çıxır"

 

Sfera.az bildirir ki, bunu iqtisadçı ekspert Natiq Cəfərli Gömrük Komitəsinin sədri Səfər Mehdiyevin son paylaşımına münasibət bildirərkən deyib. İqtisadçı qurum rəhbərinin "Nəzərdə tutulan proqnozdan əlavə 373,75 milyon manat gömrük ödənişlərinin toplanaraq dövlət büdcəsinə köçürülməsi təmin olunub” ifadəsini ciddi tənqid edib:

"Əgər ölkədə ciddi iqtisadi canlanma olsaydı, ixrac-idxal əməliyyatları kəskin artsaydı, ÜDM artım göstərsəydi, deyərdim ki, iqtisadiyyat artır, canlanma var, daha çox rüsum da yığılır. Elə deyil axı... Gömrük Komitəsi müstəqil qurum kimi qalmaq uğrunda mübarizə aparır, İqtisadiyyat Nazirliyinə birləşdirilməsini istəmir. Ona görə də iş adamlarının boğazına çöküb daha çox rüsum yığmağa, "afərin" almağa çalışır. Çox bəsit də metod fikirləşiblər: İş adamlarının təqdim etdiyi sənədlərə "inanmırlar", deyirlər ki, "invoysda" qiyməti aşağı yazdırmısız, özləri qiymət müəyyən edir və öz qiymətlərindən rüsum, ƏDV hesablayıb alırlar”.

N.Cəfərli qeyd edib ki, Gömrük Komitəsinin ƏDV toplaması, yəni vergi yığması ayrı bir nonsensdir:

"Yəni, hörmətli Səfər müəllim, yığdığınız hər manat mənim - vətəndaşın cibindən çıxır. Deməli, mənim - vətəndaşın cibindən plandan əlavə 374 mln. manat pul çıxartmısız. Bu gün sürətlə artan qiymətlərdə gömrük rüsumlarının yeni hesablanması qaydası önəmli rol oynayır”.