Meyxanaçılar niyə narkotik təbliğatçılarına çevrilir? – “Ağ ölüm”ün pulsuz reklamına “dur” deməyin zamanıdır
Gündəm
16:21 / 20.10.2021
897
Son həftə
ərzində ard-arda iki meyxanaçının narkotik satışı ittihamı ilə həbs olunması bu
sənət haqda mənfi rəyin formalaşmasına, müxtəlif söhbətlərin yaranmasına səbəb
olur.
Məlumat
üçün bildirək ki, bu, meyxanaçıların zərərli vərdişləri ilə bağlı ilk belə fakt
deyil. Bundan öncə də bənzər şəkildə meyxanaçılar bu və başqa səbəblərdən
istintaqa cəlb edilib, hətta həbsə belə düşüb. Məsələn, tanınmış söz ustadları
olan Mahir Cürət, mərhum Bayram Kürdəxanlı həbs həyatı yaşamış
meyxanalçılardandır.
Ölkəmizdə
kifayət qədər pərəstişkarı olan meyxana sənətini yaşadanların bu yaşam tərzi isə
şübhəsiz ki, gənc nəslin dünyagörüşünə mənfi təsir edir. Bir çox tanınmış
meyxanaçıların öz şeirlərində narkotik vasitələri açıq-aşkar təbliğ etməsi isə "ağ
ölüm”ün reklamından başqa heç nə deyil. Həmin meyxanaçıları dinləyən gənclərin
müəyyən qismi onların təsiri altına düşərək həyatlarını məhv edirlər.
Mövzuyla
bağlı Sfera.az-a danışan tanınmış söz ustadı Namiq Məna da (Əliyev) meyxanaçıların
el məclislərində, toylarda narkotiklə bağlı mövzulara müraciət etməsinə təəssüfləndiyini
bildirib:
"Təəssüf
ki, bu gün belə bir yanlış fikir var ki, meyxanaçı spirtli içki qəbul etməli,
ya da siz deyən kimi narkotikdən istifadə etməlidir. Məsələnin kökü əslində
SSRİ dönəminə qədər gedib çıxır. Hətta bizim dahi qəzəlxanımız Əliağa Vahid belə
bu gün spirtli içki aludəçisi kimi göstərilir. Bu və bu kimi hallar sovet təbliğatından
qaynaqlanan yanlış məlumatlardır. Bu gün də yeni nəsil yetişir və onlar da bu
yanlış təbliğata uyaraq düşünür ki, meyxanaçı spirtli içki içməli, narkotik
vasitələr istifadə etməlidir.
Düşünürəm
ki, ümumiyyətlə şeir, sənət adamı, söz xridarları narkotikin təbliğatçısı yox, əksinə
onun əleyhdarı olmalıdır. Bu gün elə adamların narkotikə qurşandığını görəndə
adam təəccüblənir. Düşünürsən ki, belə istedadlı gənc niyə narkotikaya qurşanıb?
Məncə, bu sənətin bütün nümayəndələri muğam janrının ustadlarından nümunə
götürməlidir. Bizim janr da muğam kimi ölkəmizi beynəlxalq arenalarda təmsil edə,
mədəniyyətimizə töhfə verə bilər. Bu gün bu janrda da muğamda olduğu kimi
ustadlar yetişə bilər. Mənsum İbrahimov, Alim Qasımov, Əlibaba Məmmədov kimi
muğam ustadlarımız var. Niyə bu janrda da olmasın?”.
