Cəmiyyətimizin
aktual problemlərindən biri də uşaqlar və yeniyetmələr arasında cinayət
hallarının çoxalmasıdır. Xüsusilə son vaxtlar uşaqlar və yeniyetmələr arasında
kibercinayət, dələduzluq və s. kimi qanunsuz hərəkətlərin sayı artmaqdadır.
Maraqlıdır,
problemin kökündə hansı səbəblər dayanır? Bu kimi halların qarşısının alınması
üçün nə kimi tədbirlər görülməlidir?
Mövzu ilə
bağlı Sfera.az-a danışan psixoloq Fərqanə Mehmanqızı uşaqların və yeniyetmələrin
cinayətkar kimi formalaşmasına ailələrin səbəb olduğunu bildirib:
"Uşaq cinayətlərinin
kökündə ailə dayanır. Ailə ilə uşaq arasında bağın olmaması, uşaqlara mənəvi dəyərlərin
aşılanmaması nəticəsində onların psixikasında dəyişikliklər baş verir. Eləcə də,
qayğıdan kənar uşaqlar oğurluğa və dələduzluğa, cinayətə meyil olur. Bu, iki
insanın məsuliyyətsiz şəkildə ailə qurması, dünyaya övlad gətirməsindən irəli gəlir.
Özünü yetişdirməyən cəmiyyət özünü yetişdirməkdə olan cəmiyyəti yetişdirə bilməz.
Ona görə də bu gün daha diqqətli olmaq lazımdır. Artıq ana olmağa hazırlaşan
qadınlar da müxtəlif psixoloji testlərdən keçməlidir ki, həqiqətən də bu xanım
ana olmağa hazırdırmı?”
Psixoloq
məsuliyyətsiz və normal münasibət qura bilməyən cütlüklərin dünyaya uşaq gətirməsinin
doğru olmadığını bildirərək, bunun şəxsi iş kimi qiymətləndirilməsinin yanlış
olduğunu deyib:
"Ümumiyyətlə,
yaxşı olardı ki, cütlüklər ailə qurmamışdan tibbi testlər verdiyi kimi,
psixoloji testlərdən də keçsin. Yəni cütlüklər ailə olmağı məsuliyyətini dərk
etməlidir. Hazırda uşaqların cinayətə bu dərəcədə meyil etməsi insanların məsuliyyətsizliyinin
nəticəsidir. Məsuliyyətsiz insanlar bu şəkildə cəmiyyətə "qara yara” bəxş edir.
Bəzən belə cütlüklər üçün deyilir ki, şəxsi işləridir, özləri bilərlər. Lakin hər
bir insan cəmiyyətin üzvüdür və müəyyən mənada cəmiyyətə müsbət və mənfi təsirləri
olur. Bu baxımdan insanların məsuliyətsizliyi onların şəxsi işi ola bilməz. Cəmiyyətə
qoşulan, toxunan bir şey fərdi məsuliyyət sayıla bilməz”.
Əzizə
Zeynal
