Gürcüstanın Baş naziri NATO Hərbi Komitəsinin rəhbəri ilə görüşdü
Dünya
17:46 / 07.10.2021
1557
"Regionda mövcud vəziyyəti nəzərə alaraq, NATO-nun Qara dənizdə təhlükəsizliyin təminatı prosesində fəal iştirakının əhəmiyyəti daha da artır”.
Sfera.az xəbər verir ki, bunu Gürcüstanın Baş naziri İrakli Qaribaşvili NATO Hərbi Komitəsinin rəhbəri admiral Rob Bauerlə görüşdə deyib.
Onun sözlərinə görə, NATO-nun ali hərbi qurumunun üzvlərinin Gürcüstana səfəri Alyansın ölkənin müstəqilliyi, ərazi bütövlüyü və suverenliyinə güclü dəstəyinin göstəricisidir.
İ.Qaribaşvili deyib ki, Gürcüstan NATO-nun müttəfiqi olaraq ümumi təhlükəsizlik prinsiplərinə və dəyərlərinə sadiqdir, müttəfiqlərin qlobal sülh və təhlükəsizliyi təminatı ilə bağlı səylərinə qoşulur, Gürcüstanın Əfqanıstandan tranzit və təxliyənin dəstəklənməsindəki rolu bunu sübut edir.
Tərəflər Gürcüstanda müdafiə sahəsində həyata keçirilən islahatlar, beynəlxalq tərəfdaşlarla ikitərəfli və çoxtərəfli formatlarda əməkdaşlıq, həmçinin NATO ilə siyasi və praktiki əməkdaşlıq mexanizmlərinin effektiv isitfadəsi məsələlərini də müzakirə ediblər.
