“Qarşılıqlı güzəştlər olmalıdır” – Keçmiş XİN rəhbəri Ermənistanın hava məkanımızdan istifadəsi haqda
10:33 / 07.10.2021
1366
Xəbər
verdiyimiz kimi, ötən gündən "Azərbaycan Hava Yolları” QSC (AZAL) Bakı-Naxçıvan
reyslərinin yerinə yetirilməsi üçün Ermənistanın hava məkanından istifadə etməyə
başlayıb. Aydın məsələdir ki, bununla həm də Ermənistana məxsus təyyarələr Azərbaycan
hava məkanından istifadə edə biləcək.
Maraqlıdır,
indiki halda Ermənistan təyyarələrinin Azərbaycan hava məkanından istifadə etməsi
ölkəmiz üçün təhlükə yarada bilərmi?
Mövzu
ilə bağlı Sfera.az-a danışan Azərbaycanın sabiq xarici işlər naziri Tofiq Zülfüqarov
Ermənistan təyarələrinin Azərbaycan hava məkanından istifadə etməsinin normal
bir hal olduğunu deyib:
"Burada
qeyri-adi heç nə yoxdur. Əgər biz istəyiriksə regionda sülh olsun, Ermənistanla
münaqişə bitsin, qarşılıqlı şəkildə güzəştlərə nail olmalıyıq. Təbii ki, bəzi məsələlər
var ki, onlarda güzəştə gedə bilmərik. Lakin büsbütün maksimalist olmaq da
doğru deyil.
Düşünürəm,
bu bizim ictimaiyyətdə də müsbət qarşılanacaq. Əlbəttə, təhlükəsizlik
baxımından bəzi insanların narahat olması normaldır. Lakin bu məsələlərin də
artıq həll edildiyini düşünürəm. Məsələ ondadır ki, Ermənistan və Azərbaycanın
qarşılıqlı hava məkanından istifadə etməsi təcrübəsi əvvələr olub. Atəşkəs
dövründə də bənzər şəkildə uçuşlar gerçəkləşib. Yəni belə bir təcrübə var.
Narahatlığa əsas görmürəm".
