“Ərdoğan Azərbaycanı narahat edən məsələləri Putinin diqqətinə çatdıracaq…” - Şərh

Bu sözləri Sfera.az-a "Atlas” Araşdırmalar Mərkəzinin rəhbəri Elxan Şahinoğlu Türkiyə Prezidenti Rəcəb Tayyib Ərdoğan ilə Rusiya Prezidenti Vladimir Putin arasında Soçi şəhərində baş tutacaq görüş haqda danışarkən deyib.

O bildirib ki, Türkiyə Prezidenti Rəcəb Tayyib Ərdoğanın ABŞ-da baş tutan BMT-nin Təhlükəsizlik Şurasının sessiyasından sonra Rusiyaya səfər edib, burada Prezident Vladimir Putin ilə görüşməsində qeyri-adi bir şey yoxdur:

"Məsələ ondadır ki, tərəflər arasında müzakirə ediləsi məsələ çoxdur. Belə ki, Suriya, İraq, Liviya, Aralıq dənizinin şərqi enerji, silah layihələri və əməkdaşlıq, Cənubi Qafqaz və s. mövzular ətrafında müzakirələrin gedəcəyi gözlənilir”.

Politoloqun sözlərinə görə, Ərdoğan Putinin diqətinə çatdıracaq çalışacaq ki, Türkiyənin Azərbaycanla keçirdiyi hərbi təlimlərin tək məqsədi Azərbaycan ordusunun gücləndirilməsidir:

 

"Son günlər Türkiyənin Azərbaycanla keçirdiyi hərbi təlimlər Rusiyanı həm narahat edir, həm də narazılığına səbəb olur. Bu mənada düşünürəm, Ərdoğan bu haqda Putinlə xüsusi söhbət edəcək. Ərdoğan Putini əmin edəcək ki, təlimlər Kremlə heç bir mesaj xarakterli deyil. Təlimlərin başlıca məqsədi Azərbaycan ordusun güclənməsi, təkmilləşdirilməsidir”.

E. Şahinoğlu qeyd edib ki, Ərdoğan Putinin diqqətinə həm də Azərbaycanı narahat edən məsələləri çatdıracaq:

"Rus sülhməramlılarının müvəqqəti yerləşdiyi Azərbaycan torpaqlarında təlimlər keçi̇rməsi̇, Laçın dəhlizindən qanunsuz Qarabağa TIR-ları buraxması, ermənipərəst rəsmilərin Xankəndiyə səfər etməsinə göz yumması və s. məsələlər bugün rəsmi Bakını ciddi narahat edən məsələlərdəndir. Ehtimal ki, bu məsələlər Türkiyə və Azərbaycan prezidentləri arasında da müzakirə edilib. Bu mənda düşünürəm, Ərdoğan Azərbaycanı narahat edən məsələləri, eyni zamanda 10 noyabr bəyanatının icrasını Putinin diqqətinə çatdıracaq.

 

 

Turan Rzayev