Tələbəsinin ətəyini qaldırıb yanına şillə vurduğunu açıqlayan Cəlal Şəngörə nazirdən kəskin REAKSİYA
Dünya
10:40 / 18.09.2021
807
Türkiyənin tanınmış geoloq-alimi Cəlal Şəngörün son açıqlaması ciddi səs-küy yaradıb.
Sfera.az bildirir ki, Şəngör ötən gün canlı yayımların birində onu əsəbiləşdirən tələbəsinin ətəyini qaldırıb yanına şillə vurduğunu deyib.
"O qədər əsəbləşdirdi ki, Saniyənin ətəyini qaldırıb, yanına bir şillə vurdum. Qız dəhşətə düşdü”, – deyə alim qeyd edib. Onun çıxışı qısa zaman ərzində sosial şəbəkələrdə qınaq obyektinə çevrilib.
Belə ki, ilk reaksiyalardan biri Türkiyənin ailə və sosial xidmətlər naziri Derya Yanıkdan gəlib. O, rəsmi Tvitter hesabından paylaşım edərək Şəngörün açıqlamasını kəskin tənqid edib:
"Qadına qarşı şiddətin və təcavüzün tək növü yoxdur. Şəxsin hadisəni gülərək danışması da təcavüz faktını yüngülləşdirmir. Bununla yanaşı, biz tələbə üzərindəki hökmranlıqdan da ayrıca danışacağıq. Bu cür düşüncələrlə mübarizə etməyə davam edəcəyik”.
Məşhur komediya aktyoru Şahan Gökbakar da alimin açıqlamasına sərt münasibət göstərənlərdən biri olub. O, sosial şəbəkə hesabında məsələyə münasibət bildirərkən sözügedən hadisəni cinsi istismar adlandırıb.
"Bunu dünyanın hansı ölkəsində etsəniz, haqqınızda cinsi təcavüz iddiası ilə dava açılar. Bir qız atası olaraq da professorun bu açıqlaması məni təəccübləndirdi. Atalar heç zaman qız uşaqlarının ətəyini qaldırıb şillə vurmaz”, - deyə Gökbahar fikirlərini tamamlayıb.
Günay Rəsulqızı
Sfera.az
