"Aramızda “uzunqulaq”, “tarakan” damğasını haqq edənlər var" - Deputat

 

Sfera.az bildirir ki, bunu deputat Sahib Alıyev deyib. 

"O sürücülərə Qarabağa yanacaq daşıtdıranların məqsədi təkcə düşmənə kömək deyil, həm də fars şovinistlərinin haqqımızda işlətdikləri "uzunqulaq”, "tarakan” və sair təhqirlərə haqq qazandırmaqdı. Çünki mənliyi, adamlığı, şərəfi  olan heç kim qardaşının qanını tökən, məscidlərini, məzarlıqlarını dağıdan, özlərini yurdlarınından didərgin salıb evlərinin altını üstünə çevirən düşmənə yardım etməz, yanacaq aparmaz”, - deyə millət vəkili bildirib.

S.Alıyev həmçinin bu cür hallarla ilk dəfə üzləşmədiyimizi vurğulayıb:

"Qarabağın bir hissəsi, Şərqi Zəngəzur işğal altında olarkən orada sökülən evlərin, məscidlərin materialları niyə əziz-xələf farslara, digərlərinə yox, məhz azərbaycanlılara satılırdı? Bizi parçalamaq, üz-üzə qoymaq və az öncə vurğuladığım kimi haqqımızda işlətdikləri təhqirlərin nə dərəcədə yerində olduğunu göstərmək üçün. Varmı aramızda "uzunqulaq”, "tarakan”  damğasını haqq edənlər? Var. Amma o sürücülər tarakan deyil, mədəsiylə düşünən yazıq adamlardır. Tarakanlar isə ağlı, savadı olsa da, rejimə, fars şovinizminə xidmət edən, düşmənlərimizə qucaq açan, dəstək göstərənlərdir.

İrandakı soydaşlarımız deyəndə, mənim gözümün önünə rejim nökərləri, sözün hər anlamında o qərib, yazıq sürücülər yox, 44 günlük savaş zamanı Təbrizdə, Sulduzda, Ərdəbildə ayağa qalxanlar, Ermənistana göndərilən içi yük, həm də hərbi təyinatlı yük dolu tırların qabağını kəsənlər, düşmənin necə belini sındırdığımızı görüb  Arazın o tayında yallı gedənlər, sevinc göz yaşlarını saxlaya bilməyənlər, "Traxtor”un oyunları zamanı "Azərbaycan” hayqıranlar gəlir. Ona görə də mədəsiylə düşünənlərin cavabını qoyun onlar versin. Əminəm ki, verəcəklər də”.