“Sülhməramlıların Laçın dəhlizini karvansaraya çevirmək ixtiyarı yoxdur” - Politoloq
13:13 / 13.09.2021
854
"Gorus-Qafan
yolunun suveren ərazimizdən keçən hissəsinə polis postu qurmaq Ermənistan ərazisindən
keçərək Qarabağa qanunsuz daxil olan İran maşınlarının qarşısını almayacaq. Biz
sadəcə, yollardan birinin qarşısını almış oluruq. Problemin kökü Gorus-Qafan yolunda
deyil, Laçın dəhlizindədir”.
Bu
sözləri Sfera.az-a açıqlamasında politoloq Qabil Hüseynli digər ölkələrə aid nəqliyyat
vasitələrinin Rusiya Federasıyası sülhməramlılarının müvəqqəti yerləşdirildiyi
Azərbaycan ərazilərinə qanunsuz keçməsi haqda danışarkən deyib.
Onun
sözlərinə görə, Azərbaycan Respublikasının razılığı olmadan digər ölkələrin
hüquqi və fiziki şəxsləri və onlara aid nəqliyyat vasitələri ölkə ərazisinə
daxil ola bilməz:
"Bu
kimi hallar ölkəmizin qanunlarının pozulmasıdır. Təəssüf ki, bu gün belə hallar
vaxtaşırı baş verir. Azərbaycan Respublikası və Rusiya Federasiyası Prezidentlərinin
və Ermənistan Baş nazirinin 10 noyabr 2020-ci ildə imzaladığı üçtərəfli bəyanat
açıq şəkildə pozulur. Xüsusilə Rusiya sülhməramlıları müvəqqəti nəzarət etdikləri
ərazilərdən xarici ölkələrə məxsus nəqliyyat vasitələrinin Azərbaycan ərazisinə
girməsinə icazə verir. Burada məsələ İran və ya bir başqa ölkənin TIR-larının
Qarabağa daxil olması və ya separatçılara dəstək verməsindən getmir. Məsələ bu
qanunsuzluğa Rusiya sülhməramlılarının göz yummasıdır.
Rəsmi
Bakı vaxt itirmədən heç olmasa Laçın dəhlizində nəzarət postları qurmalı, dəhliz
vasitəsilə Qarabağa qanunsuz şəkildə daxil olan yüklərin qarşısını almalıdır.
Bu gün Gorus-Qafan yolunun suveren ərazimizdən keçən hissəsinə polis postunun digəri
də Laçın dəhlizində qurulmalıdır”.
Q.Hüseynlinin
sözlərinə görə, Zəngəzur dəhlizi, Qazaxın 7 kəndi, Naxçıvanın Kərki ekskrlavı
kimi məsələlər həllinin gözlədiyi bir vaxtda biz sülhməramlıların Laçın dəhlizi
vasitəsilə Qarabağa başqa ölkələrin nəqliyyat vasitələrini qanunsuz şəkildə
buraxması haqda danışırıq:
"10
noyabr bəyanatına görə, Rusiya sülhməramlılarına konkret səlahiyyət zonası və səlahiyyətlər
verilib. Onların nə səlahiyyətlərini aşma, nə də səlahiyyət yerlərindən başqa
yerlərə müdaxilə etmək ixtiyarı var. Laçın dəhlizi onların nəzarətinə regionda
gərginliyin azalması fonunda müvvəqəti olaraq verilib. Lakin bu, sülhməramlılara
Laçın dəhlizini karvansaraya çevirmək ixtiyarı vermir. Laçın dəhlizi vasitəsilə
Qarabağa daha nələr daşınmadı ki? Qarabağın Azərbaycan torpağı olması ilə
gec-tez hamı barışacaq. Bunun başqa yolu yoxdur.
Turan
Rzayev
