Dollar ucuzlaşmağa davam edəcək - SƏBƏB

Sfera.az bildirir ki, Dollar İndeksi avqustun 20-də 93,7 səviyyəsinə çatdıqdan sonra, davamlı düşərək 92,1 həddinə enib. Müqayisə edilən müddətdə dollar 1,7 faiz ucuzlaşıb.

Dolların ucuzlaşması COVID-19 virusunun yayılmasında növbəti dalğanın baş verməsi və pandemiyanın yenidən ABŞ iqtisadiyyatına mənfi təsir edəcəyi gözləntiləri ilə bağlıdır. Bugünlərdə ABŞ-da kənd təsərrüfatından xaric məşğulluq göstəriciləri açıqlanacaq. Proqnozlaşdırılır ki, ötən ayda məşğulluq 750 min nəfər artacaq. Bu artım səviyyəsi iyulda qeydə alınan göstəricidən (930 min) azdır.

Proqnozun özünü doğrultması o demək olacaq ki, ABŞ-da yeni iş yerlərinin açılma sayı azalıb. Bu vəziyyətdə ABŞ mərkəzi bankının monetar genişləndirmə planının təxirə salması ləngiyə bilər.

Mərkəzi bank hər ay 120 milyard dollar dəyərində əlavə pulu dövriyyəyə buraxır. Bununla bazarda dolların həcmi artır ki, bu da iqtisadi aktivliyin artmasına, tələbin güclənməsinə, məşğulluq göstəricilərinin yaxşılaşmasına və inflyasiyanın yüksəlməsinə kömək edir.

ABŞ mərkəzi bankı qeyd edilən göstəricilərin arzulanan səviyyəyə çatdığını əsas gətirərək əlavə dollar emissiyasını dayandırmaq və ya azaltmaq istəyir.

Ekspertlər güman edir ki, məşğulluqdakı artımın zəifləməsi mərkəzi bankı monetar genişləndirmə siyasətini təxirə salmağı bir neçə ay ləngidəcək ki, bu da dolların bahalaşmasının qarşısını alacaq.

Avqustun 20-dən sonra dolların ucuzlaşması da məhz qeyd edilən vəziyyətlə bağlıdır.

Vasif

Sfera.az