Azərbaycanda bu şəxslər 1700 manatdan çox maaş alır
İqtisadiyyat
12:21 / 01.09.2021
1307
Azərbaycanda muzdla çalışanların 4,5 faizinin aylıq maaşı 1700 manatdan yüksəkdir. Rəsmi məlumatlara əsasən 2020-ci ilin noyabrında ölkəmizdə 1,69 milyon insan muzdlu işçi olub və onların 76 mindən çoxu 1700 manat və daha çox maaş alıb.
Sfera.az bildirir ki, 2019-cu ildə muzdlu işçilərin 4,2 faizi, yəni 68,9 min nəfəri 1700 manatdan artıq maaş alırdı. Bir il ərzində 1700 manatdan çox maaş alanların sayı 7 mindən çox artıb.
Yüksək maaş alanların çox hissəsi mədənçıxarma sənayesində, maliyyə və sığorta, informasiya və rabitə sahəsində çalışanlardır. Mədənçıxarma sənayesində çalışanların 38,5 faizinə, maliyyə və sığorta sahəsində çalışanların 24,2 faizinə, informasiya və rabitə sahəsində işləyənlərin isə 12,5 faizinə 1700 manatdan çox maaş verilir.
Muzdla çalışanların çox hissəsi isə orta əməkhaqqından aşağı maaş alır. 2020-ci ilin yekunlarına görə muzdla çalışanların 73 faizinə orta əməkhaqqından (703 manat) az maaş ödənilib. Əməkhaqqı alanların 3,2 faizi 250 manatdan az, 23,3 faizi 250-300 manat, 10,4 faizi 301-350 manat, 16,7 faizi 351-450 manat həcmində maaş alıblar.
Vasif
Sfera.az
