Əlbəyaxa döyüş rinqinə çevrilən Ermənistan parlamenti və çarəsiz qalan Paşinyan... - "Düşməni yeni müharibə təhlükəsi gözləyir"

 

Bunu Sfera.az-a açıqlamasında politoloq Əlimusa İbrahimov deyib. O, belə davam edəcəyi halda yeni seçilmiş parlamentin işinə başlaya bilməyəcəyini vurğulayıb:

"Parlamentdə dünən və bu gün  şahidi olduğumuz hadisələr haqqında Ermənistanın ikinci prezidenti olmuş, Qarabağ erməni klanının lideri hesab olunan Robert Köçəryan hələ iki ay bundan qabaq proqnoz vermişdi. O elan etmişdi ki, "Ermənistan” bloku seçkilərdə qalib gəlmədi, amma yeni parlamentin işini pozmaq üçün müxalifətin əlində yetərincə resurs var. Köçəryan növbədənkənar parlament seçkisi bitəndən və nəticələr məlum olandan sonra bəyan etdi ki, bu parlamentin ömrü çox uzun olmayacaq. O, eyni zamanda tərəfdarlarını il yarımdan sonra keçiriləcək yeni parlament seçkilərinə hazırlaşmağa çağırırdı.

Eks-prezident kənardan idarə etdiyi komanda və yeni parlamentə göndərdiyi emissarı, Xocalı qatili  Seyran Ohanyanın əli ilə parlamentin işini iflic vəziyyətinə salmağa çalışır və hələlik buna nail olur. Onun məqsədi parlamentin fəaliyyətini sıfıra endirmək və orada baş verən qarşıdurmanı müəyyən müddətdən sonra küçəyə daşımaqdır. Parlament tam qüvvəsi ilə fəaliyyət göstərə bilmədikdə baş nazir Nikol Paşinyanın seçkiqabağı kampaniya zamanı xalqa verdiyi vədlər yerinə yetirilməyəcək, əhalinin iqtisadi vəziyyəti günü-gündən daha da ağırlaşacaq. Bu da yeni hökumətə və Paşinyana qarşı inamsızlığın artması ilə nəticələnəcək. Belə şəraitdə hökumət Avropa İttifaqının ayırdığı 2.6 milyard avro həcmində  yardımı ölkənin ayaqda durması üçün təyinatı üzrə deyil, əhalinin rifahını yüksəltmək istiqamətində xərcləmək məcburiyyətində qalacaq. Bu da Nikol Paşinyanın baş nazir kimi Avropa İttifaqı və Amerika qarşısında gözdən düşməsinə səbəb olacaq". 

Politoloqun sözlərinə görə, digər tərəfdən üçtərəfli müqavilə çərçivəsində üzərinə düşən vəzifələri yerinə yetirməyən Ermənistan Azərbaycan tərəfindən haqlı olaraq yeni müharibə təhlükəsi ilə üzləşəcək:

"Artıq həm region, həm də beynəlxalq aləmdə Azərbaycanın Ermənistana daha 30 il düşünmək imkanı verməyəcəyini yaxşı bilirlər. Parlamentdə baş verən son qarşıdurma və eləcə də Azərbaycan-Ermənistan sərhədində baş verən son insidentlərin xaricdən tətikləndiyini də düşünmək üçün yetərincə səbəblər var. Hadisələrin Paşinyanın Qərbə tərəf meyllənməsinin qarşısını almaq üçün Rusiya tərəfindən səhnələşdirilməsi də mümkündür. Yaxud ermənilərin ATƏT-in Minsk qrupunun reinkarnasiya edilməsi üçün Fransa tərəfindən qızışdırıldığını da söyləmək olar. Məqsədindən asılı olmayaraq, istənilən halda Ermənistanda baş verən son hadisələr nə yeni qurulmuş ikinci Paşinyan hökumətinə, nə də getdikcə uçurumun daha da dibinə sürüklənən erməni xalqına faydalıdır".