Hansı bank hansı müştərilərlə işləməyə üstünlük verir? - Araşdırma

 

Sfera.az bildirir ki, banklar üçün əsas hədəflərdən biri müştəri məmnuniyyətini təmin edib, daha çox müştəri ilə işləməyə nail olmaqdır. Amma bu məqsədə çatmaq üçün banklar heç də bütün şəxslərlə əməkdaşlıq etmir. Banklar müştəri kontingentini müəyyənləşdirərkən daha çox güvəndiyi sahələrin nümayəndələri ilə işləməyə üstünlük verirlər.

 

Bəs, Azərbaycanın tanınmış bankları hansı müştəri kontingentinə üstünlük verir? 

 

Bank müştəriləri 3 qrupa bölünür: cari hesabı olanlar, kredit alanlar və depozit yerləşdirənlər. Rəsmi məlumatlara əsasən, müştəri hesablarının 19,929 milyondan çoxu cari, 3,15 milyondan çoxu kredit, 235,2 mindən çoxu depozit hesabıdır.

 

 

Bununla belə bəzi banklar müştəri kontingenti ilə bağlı səthi məlumatlar açıqlayır.

 

Həmin məlumatların təhlili zamanı bəlli olur ki, Azərbaycanda ən böyük müştəri kontingenti olan bank "Kapital Bank” ASC-dır. "Kapital Bank” 3 milyondan çox fiziki və 22 mindən artıq hüquqi şəxsə xidmət göstərir.

 

Bankın məlumatlarına əsasən, müştəri kontingentinin böyük hissəsi dövlət büdcəsindən maliyyələşən təşkilatlarda çalışanlar, o cümlədən təhsil işçiləri, həmçinin pensiyaçılardır.

 

Bununla belə bankın, xidmət şəbəkəsi geniş olduğuna və böyük maliyyə vəsaitinə sahib olduğuna görə müştəri kontingenti də çeşidlidir. Şəxsi, ailəvi və sair məqsədlər üçün bankla əməkdaşlıq edən fiziki şəxslər çoxdur. Bu şəxslər banklardan cəmi kreditlərin 74 faizini alıb. Müştəri çoxluğuna görə sənaye, ticarət, informasiya və rabitə, tikinti sahələri də seçilir.

 

Ölkəmizin ən böyük bankı olan "Azərbaycan Beynəlxalq Bankı” ASC-nin 1,5 milyona yaxın müştərisi var. Onlardan 1,4 milyon nəfərdən çoxu fiziki şəxs, 20 minə yaxını hüquqi şəxsdir.

 

"Azərbaycan Beynəlxalq Bankı” kiçik və orta biznes sahələri, energetika, nəqliyyat-kommunikasiya, neft-kimya və s. sahələrdə reallaşdırılan irimiqyaslı dövlət layihələrində, sosial proqramlarda yaxından iştirak edir. Eyni zamanda qeyri-neft sektorunda çalışan iri, kiçik və orta sahibkarlıq subyektlərinin maliyyələşdirilməsinə fəal dəstək verir. Həmçinin fərdi müştərilərin pərakəndə bank məhsul və xidmətlərinə olan ehtiyaclarını qarşılayır.

Ölkəmizin daha bir böyük bankı olan "Paşa Bank” ASC biznes sektoru ilə işləməyə üstünlük verir. Bank əsasan ticarət və tikinti sektorları üzrə çalışır. Sənayenin müxtəlif sahələri, kənd təsərrüfatı sahələrində də müştəri kontingenti çoxdur.

 

"Xalq” Bank" ASC müştəri kontingenti əsasən sənaye sektorunu əhatə edir. Təsadüfi deyil ki, bankdan alınan kreditlərin 26 faizi bu sahəyə verilib. Ticarət, kənd təsərrüfatı, tikinti sahələri bankın digər müştəri kontingentini formalaşdırır.

 

Müştəri məmnuniyyəti yüksək olan banklardan biri də "Turanbank”dır. "Turanbank” biznes sektoru ilə işləməyə üstünlük verir. Bununla bağlıdır ki, bank kreditlərin 65 faizindən çoxu biznes sahələrinə ayırıb.

 

Bankın kreditlərinin 174 milyon manatını (53,2%) korporativ kreditlər, 45 milyon manatını (13,8%) kiçik və orta biznes kreditləri, 38 milyon manatını (11,6%) mikrokreditlər, 70 milyon manatını (21,4%) isə pərakəndə müştərilərə verilən kreditlər təşkil edib.

 

 

Ekspert bidirdi ki, banklar rəsmi gəliri yüksək olmayan bəzi sahələrdə çalışan müştərilərlə də əməkdaşlıq etməkdən çəkinmir: "Banklar Azərbaycanda sahələr üzrə çalışanların gəlirinin hansı səviyyədə olduğunu təxmini olsa da bilir. Məsələn, orta məktəb müəllimi kredit götürmək istəyir. Bank əməkdaşı müəllimin hansı fənni tədris etməsi ilə maraqlanır. Əgər müəllim riyaziyyatdan dərs deyirsə və iş təcrübəsi böyükdürsə, deməli həmin müəllim böyük ehtimalla repetitorluq da edir, onun gəliri yüksəkdir. Bank bunu nəzərə alaraq həmin müəllimlə əməkdaşlıq edir. Amma müəllim idman müəllimidirsə, ona kredit vermir”.

Ə.Həsənov bank və sığorta qurumları, hərbi, hüquq-mühafizə xidmətləri, təhsil, səhiyyə, energetika, ticarət, xidmət sektorlarında çalışan işçilərlə bankların daha çox əməkdaşlıq etdiyini dedi.