İran prezidentinin təyin etmək istədiyi nazir - "İsraili hər an dağıda bilərik"
Dünya
17:01 / 12.08.2021
1173
"İbrahim
Rəisi əsas postlara İslam Keşikçiləri Korpusuyla sıx bağlı olanları və anti-Qərb
meyilli namizədləri irəli sürüb".
Sfera.az xəbər verir ki, bunu İranda yeni qurulacaq
Nazirlər Kabinetinin tərkibi ilə bağlı danışarkən politoloq Elxan Şahinoğlu
deyib. Politoloq siyahıda İsrailə qarşı açıq qəzəb nümayiş etdirən yeni nazirin
təklif edildiyini bildirib:
"İran
prezidenti İbrahim Rəisi bu gün parlamentə nazirlər kabinetinin siyahısını məktubla
göndərib. Parlament nazirləri avqustun 22-dəki iclasında müzakirə edəcək. Xarici
işlər naziri vəzifəsinə irəli sürülən Hüseyn Əmir Abdullahiyan "Sepah”ın "Qüds”
briqadasına yaxın şəxsdir. O Qərbə və İsrailə nifrət edən açıqlamaları ilə
yadda qalıb. "İsraili hər an dağıdıb, onun şəhərlərini viran qoya bilərik” deyən
yeni nazir ali dini lider Əli Xameneyi və "Hizbullah”ın lideri Həsən Nəsrullahla
yaxınlığı ilə tanınır. Rəisinin daxili naziri postuna irəli sürdüyü Əhməd Vəhidi
də beynəlxalq aləmdə böyük rezonans doğurub. Əhməd Vəhidi 1994-cü ildə "Sepah”
və ETTELAAT-a bağlı qüvvələrin
Argentinanın paytaxtında yəhudilərə məxsus "Amya” mərkəzində törətdiyi terror
aktında iştirakda şübhəli bilinir. Həmin partlayış zamanı 80-dən çox insan həlak
olmuşdu. O 2007-ci ildən İnterpoul-un axtarış siyahısındadır".
Politoloq İranın qarşısında 5 problemin olduğunu
bildirib:
"Beləliklə, İbrahim Rəisi kabineti də özü kimi mühafizəkarlardan formalaşdırıb.
Parlamentdə mühafizəkarların çoxluqda olduğunu nəzərə alaraq nazirlərin təsdiq
olunacağı şübhə doğurmur. Yeni nazirlərin qarşısında titanik problemlər var.
Birincisi, İranda pandemiya tüğyan edir, virusa yoluxma və ölüm halları azalmır,
vaksin çatışmır. İkincisi, pandemiya və sanksiyalar iqtisadiyyatı çökərdib,
sosial problemlər artıb. Üçüncüsü, Tehranın Vaşinqtonla "nüvə anlaşması” danışıqları
dalana dirənib. Dördüncüsü, İran İsraillə müharibə astanasındadır. Beşincisi,
Tehranın ərəb dünyasının bir hissəsiylə də münasibətləri gərgindir. Bu problemləri
islahatçı adlanan keçmiş prezident Həsən Ruhani və komandası həll edə bilmədi. Mühafizəkarlrın şansı nə qədərdir – bunu
zaman göstərəcək".
Sfera.az
