Qida məhsulları ilə özümüzü necə təmin edirik? - Vacib statistik göstəricilər açıqlandı
13:40 / 06.08.2021
953
Azərbaycanda ərzaq məhsulları ilə özünütəminetmə səviyyəsi
açıqlanıb.
Quş əti ilə təminat daha çox yaxşılaşıb. 2019-cu ildə
74,6 faiz olan özünütəminat səviyyəsi ötən il 79 faizə yüksəlib. Adıçəkilən ət və ət məhsulları əhalinin daha çox
istehlak etdiyi heyvandarlıq məhsullarından olduğundan bu göstəricilərin
yaxşılaşması yerli istehsal hesabına ətlə təminatı ümumən yaxşılaşdırıb.
Müqayisə edilən dövrdə bu göstərici paxlalılarda 72
faizdən 60 faizə, kartofda 90,8 faizdən 90,6 faizə, tərəvəzdə 115 faizdən 110
faizə, meyvədə 123 faizdən 116 faizə, pomidorda 138 faizdən 131 faizə düşüb. Müsbətə
doğru dəyişiklik qoz və fındıqda (130 faizdən 138 faizə), narda (106 faizdən
112 faizə), üzümdə (92,5 faizdən 96 faizə), bostan məhsullarında (99,7 faizdən
100,8 faizə) qeydə alınıb.
2020-ci ilə dair açıqlanan məlumatlardan görünür
ki, bəzi ərzaq növləri üzrə təminetmə yaxşılaşsa da bəzilərində vəziyyət pisləşib.
Yaxşılaşma əsasən heyvandarlıq və sənaye məhsullarında, pisləşmə isə bitkiçilik
məhsullarında müşahidə edilib.
Sfera.az rəsmi məlumatlara istinadən bildirir ki, bütün
növ ət və ət məhsulları ilə özünütəminetmə səviyyəsi 2020-ci ildə 84,5 faizə
yüksəlib. Bu göstərici 2018-ci ildə 82,7 faiz, 2019-cu ildə 82,5 faiz idi.
Ət məhsulları ilə təminatın yaxşılaşmasına mal və
quş əti ilə təminatın yaxşılaşması kömək edib. Azərbaycan yerli istehsal hesabına mal ətinə olan tələbatının
87,4 faizini ödəyib. 2019-cu ildə mal əti ilə təminat 86 faiz idi.
Amma elə heyvandarlıq məhsulları var ki, onlarla təminat
pisləşib. O cümlədən qoyun əti, donuz əti, süd və süd məhsulları, balıq və
balıq məhsulları ilə təminat səviyyəsi aşağı düşüb. Qoyun əti ilə təminat səviyyəsi
97,3 faizə, donuz əti ilə təminat 4,7 faizə, süd məhsulları ilə təminat 83,5
faizə, balıqla təminat 81,7 faizə geriləyib.
Perspektivdə heyvandarlıq məhsulları ilə özünütəminetmə
səviyyəsinin yaxşılaşması gözlənilir. Çünki işğaldan azad edilən Kəlbəcər, Laçın,
Qubadlı və Zəngilan rayonları Azərbaycanın böyük heyvandarlıq rayonlarından
olub və gələcəkdə bu rayonların hesabına mal və qoyun əti istehsalının nəzərəçarpacaq
dərəcədə artması proqnozlaşdırılır.
Sənaye istehsalından keçmiş əsas növ ərzaq məhsulları
ilə özünütəminetmə səviyyəsində fərqli dinamika olub. Şokalad və şəkərli qənnadı
məmulatlarında, makaron məmulatlarında, bitki yağlarında, meyvə və tərəvəz şirələrində,
pendirlərdə, şəkər istehsalı üçün xammalda, çayda, duzda təminat yaxşılaşıb. Kərə
yağı, süd, düyü, mineral və qazlı sularla özünütəminat səviyyəsi isə pisləşib.
Azərbaycanın bitkiçilik məhsulları ilə özünütəminat
səviyyəsi taxıl məhsulları nəzərə alınmasa yüksək səviyyədədir. Lakin ötən il əksər
bitkiçilik məhsulları üzrə təminat göstəricilərində geriləmə qeydə alınıb.
Taxılla təminat 2018-ci ildə 74,1 faiz olduğu halda ötən il 68,1 faizə geriləyib.
Vasif
