Azərbaycan səfirliyinin avtomobili qəzaya düşdü - FOTOLAR
Azərbaycanın Ukraynadakı səfirliyinin xidməti avtomobili Kiyev şəhərində zəncirvari yol qəzasına düşüb.
Sfera.az "Report"a istinadən xəbər verir ki, Naberejno-Kreşatitskaya küçəsində Poçtovaya meydanından Podola rayonu istiqamətində baş verən qəza zamanı 4 maşın toqquşub.
Hadisə iştirakçılarından birinin sözlərinə görə, Azərbaycan səfirliyinə məxsus "Opel" markalı avtomobil hərəkətdə olarkən ona arxadan "VAZ" markalı maşın çırpılıb. Nəticədə "Opel" 180 dərəcə çevrilib. Zərbənin gücündən yol kənarında dayanan daha iki maşına ziyan dəyib.
Xilasedicilər yerə dağılan yanacağın alovlanmasının qarşısını almaq üçün asfalta su tökmək məcburiyyətində qalıblar.
"Opel"in sərnişini və "Jiquli"nin sürücüsünə hadisə yerində ilkin tibbi yardım göstərilib. Hər iki zərərçəkən xəstəxanaya aparılmaqdan imtina edib.
İnsident səbəbindən Podola istiqamətində maşınların hərəkəti tamamilə dayandırılıb. Qəzanın təfərrüatları dəqiqləşdirilir.
