“LGBT üzvlərinə qarşı aparılan kampaniya anlaşılan deyil” – Partiya sədri
16:45 / 08.07.2021
1322
"Azərbaycanda saysız-hesabsız problemlər
olduğu halda, siyasi partiya liderlərinin, ekspertlərin LGBT mövzusunu bu qədər
həssaslıqla gündəmdə saxlamaq cəhdi, LGBT üzvlərinə qarşı aparılan kampaniya
anlaşılan deyil”.
Sfera.az bildirir ki, bunu Gələcək Azərbaycan
Partiyasının sədri Ağasif Şakiroğlu deyib.
Partiya sədri qeyd edib ki, LGBT üzvü olmaq və
ya olmamaq insanların öz seçimidir: "Konstitusiyamızda da göstərildiyi kimi, şəxsi
həyat toxunulmazdır. Necə ki, kimsə
mömin, ateist, deist və sair olmaq seçimində sərbəstdir. Hər bir vətəndaş öz həyatını
yaşayır. Bundan faciə düzəltməyə gərək yoxdur.
Əsl fəlakət demokratik cəmiyyət qurmaq uğrunda
yola çıxmış, demokratik, liberal dəyərlərdən danışan həmkarlarımın şovinist
düşüncələrlə ortaya çıxmasıdır. O cümlədən korrupsiyaya, rüşvətxorluğa, məmur
özbaşınalıqlarına, qanunsuz məhkəmə qərarlarına, haqsızlığa, seçki
saxtakarlığına səs çıxarmağa cəsarəti olmayanların belə qeyri-siyasi mövzularda
danışmağa "cəsarət” tapmasıdır”.
