Azərbaycanlıları Türkiyədə ev almağa həvəsləndirən nədir? - Açıqlama
15:26 / 02.07.2021
1518
Bu ilin may ayı ərzində Azərbaycan vətəndaşları
Türkiyədə 47 daşınmaz əmlaka sahib olublar. Türkiyə Statistika İdarəsinin məlumatına
görə, azərbaycanlılar Türkiyədə ev alan xaricilərin sırasında 9-cu yerdə qərarlaşıb.
Əmlak məsələləri üzrə ekspert Nüsrət İbrahimov
Sfera.az-a açıqlamasında bunun bir neçə
səbəbinin olduğunu deyib: "Bir neçə il bundan əvvəl Türkiyədə xaricilər
üçün daşınmaz əmlaka investisiyalar üzrə "yaşıq işıq” yandırıblar. Orada sənədləşmə,
torpaq sahəsinin özəlləşdirilməsi, tikinti aparılması kimi məsələlər çox sadələşdirilmiş
prosedurdur. Ona görə nəinki, Azərbaycandan, dünyanın bir sıra başqa ölkələrindən
də Türkiyənin əmlak bazarına axın var, investisiya yatırılır. İkinci səbəb iş
adamlarının əksəriyyətinin Türkiyədə biznesinin olmasıdır. Onlar vaxtaşırı
getdiklərinə görə bu ölkədə əmlak alırlar, eyni zamanda yaşayış üçün də istifadə
edirlər.
Digər qrup insan mənzilləri alıb kirayəyə verərək
aylıq gəlirlərini təmin edirlər. Başqa qrup insanın isə övladları Türkiyədə təhsil
alır, onlar yaşayış şəraitini yaxşılaşdırmaq üçün daşınmaz əmlak, xüsusən də mənzil
almağa üstünlük verirlər. Yəni, yanaşmalar müxtəlifdir. Məsələn, müəyyən qrup
da düşünür ki, övladları kiçik yaşda ikən mənzil alsın, gələcəkdə orada
oxusunlar, işləsinlər və.s”.
Müsahibimiz deyib ki, vətəndaşlarımız ehtiyat
variant kimi Türkiyədə mənzil almağa can atırlar:
"Bundan əvvəl, Londonda imkanlı adamların mənzil
sahibi olması dəbdə idi. Eyni zamanda yeni nəsil orta iş adamları daha çox Şərqi
Avropada mənzil almağa üstünlük verirdilər – Çexoslovakiya, Polşa kimi ərazilərdə.
Son bir neçə ildir ki, daşınmaz əmlaka investisiya yatırmaq üçün Türkiyəyə axın
çoxalıb.
Buna baxmayaraq xaricdə əmlak bazarı sahəsində canlanma var, deyə bilmərik.
Hər şey öz axarında davam edir”.
Günay Rəsulqızı
