“Paşinyan həmin çıxışı ilə yeni düzənin yaradılacağı mesajını verir” - Açıqlama

 

Bu sözləri Sfera.az-a açıqlamasında Ermənistanın müvəqqəti baş naziri Nikol Paşinyanın "44 günlük müharibənin şərtləri ciddi və ətraflı araşdırılmalıdır” fikrinə münasibət bildirərkən, QAFSAM sədrinin müavini Nazim Cəfərsoy deyib:

 

Həmsöhbətimizin fikrincə, bu gedişlə  yaxın dönəmdə müharibə dövründə vəzifədə olan ordu, təhlükəsizlik orqanları və dövlət bürokratiyasının bütün sferalarına yönəlik hüquqi prosesin başlanacağını görə bilərik: 

 

"Paşinyan həmçinin müharibə dövrünü, orada baş verənləri, səbəb və nəticələri hüquqi və siyasi baxımdan araşdırmaq istəyir. Bu isə o deməkdir ki, hüquqi mənada Paşinyan başda ordu olmaqla özünə müxalif olan qruplaşmaları dövlət sistemindən daha sürətlə təmizləmək niyyətindədir. Belədə həmin şəxslərə qarşı vətənə xəyanət, casusluq, səlahiyyətin öhdəsindən gələ bilməmək, əmrə tabe olmamaq ittihamları irəli sürülə bilər”.

 

Ekspert qeyd edib ki, önümüzdəki dönəmdə Ermənistan parlmentində müharibənin nəticələrini araşdıran siyasi tədqiqat kommisiyanın yaradılması da mümkündür:  "Əslində bütün bunlar seçkidən sonra gözlənilən idi. Çünki Paşinyan seçki kampaniyasında məxməri inqilabdan artıq "polad inqilabı” na keçməyin zəruri olduğunu söyləyirdi. Bir sözlə, Paşinyanın bu mesajı götərir ki, o qarşıdakı dönəmdə həm dövlət kadrlarını təmizləmək və rəqiblərini təzyiq altına almağı qarşısına məqsəd qoyub. Bu yolda isə həm hüquqdan, həm də parlamentdəki üstün mövqeyindən yararlanmağı düşünür”.

 

 

Rüfət Sultan