Məşhur dələduz “Tosuncuk” polisə təslim oldu - FOTO
14:09 / 01.07.2021
1525
Türkiyədə 100 mindən çox şəxsi aldadaraq milyonlarla dolları ələ keçirən və uzun müddətdir beynəlxalq axtarışda olan "Tosuncuk” ləqəbli dələduz Mehmet Aydın Braziliyanın San-Paulu şəhərində polisə könüllü təslim olub.
Sfera.az bildirir ki, o, ötən gün vəkilləri vasitəsilə "Sözçü” qəzetinə videomüraciət göndərərək təslim olmağa hazırlaşdığını deyib.
Özünün günahsız olduğunu söyləyən Aydın "Bu proyektə başlayanda hədəfim oyun platformasından istifadə edən şəxslərin həm oyun oynamaqları, həm də şirkətimizin reklam büdcəsi üçün ayırdığı vəsaitdən faydalanmaqlarını təmin etmək idi. Heç zaman kiməsə ziyan vurmaq və ya dələduzluq etmək kimi niyyətim olmayıb. Lakin nəticədə şirkətin çox böyüməsi, pis niyyətli insanların haqsız qazanclar əldə etməsi və ya buna cəhdləri səbəbindən sizin kimi mən də yanıldım”, - deyə qeyd edib.
Aydının vəkili Şehmus Uluç onun yaxın günlərdə Türkiyəyə gətiriləcəyini açıqlayıb.
Xatırladaq ki, Mehmet Aydın 2018-ci ildə qurduğu "Çiftlik Bank” internet oyunu ilə 132 min 222 nəfərdən 1 milyard 139 milyon lirə ələ keçirərək xaricə qaçmışdı.
Günay Rəsulqızı
Sfera.az
