“Köçəryan gec-tez bu məğlubiyyətlə barışacaq”

“Köçəryan gec-tez bu məğlubiyyətlə barışacaq”
"Köçəryan istədiyi halda seçkilərin nəticələrini tanımaya bilər. Onsuz da Nikol Paşinyan hakimiyyəti formalaşdırmaq üçün lazım olan barajı keçib”.

Bunu Sfera.az-a açıqlamasında politoloq Turan Rzayev  Ermənistanın keçmiş prezidenti Robert Köçəryanın "Hakimiyyət mövcud kursuna davam edərsə, il yarımdan sonra yenidən erkən parlament seçkiləri keçiriləcək" fikrini şərh edərkən deyib.
 
Müsahibimiz qeyd edib ki, Ermənistanda xalq faktiki olaraq seçimini edib və onlar Köçəryanın müharibə və revanşist ritorikasına deyil, məhz Paşinyanın sülh tərəfdarı vədlərinə inanıb:
 
"72-yə yaxın deputatın təyin edilməsində Paşinyanın səlahiyyəti var. Bu, həmçinin Paşinyanın parlamentdəki həm qərar vermək mexanizmini reallaşdırır, həm də parlamentdəki gücünü formalaşdırır. Köçəryanın yenidən seçkilərə getməklə bağlı fikirləri heç bir şeyi dəyişmir. Dünya təcrübəsində də var ki, məğlub tərəf heç vaxt qarşı tərəfin qalibiyyətini tanımır və mütləq problem axtarmağa çalışır. Köçəryanın məğlubiyyəti faktiki olaraq, Ermənistan cəmiyyəti üçün müharibənin bitdiyini göstərir. Bu gün Ermənistan revanşist qüvvələri daha güclü olsaydı, xalq yenidən müharibə istəsəydi, əmin olun ki, Roberti seçərdi”.

T.Rzayevin sözlərinə görə, Köçəryan indiki halda hələ də Kremlin ona dəstək verəcəyini düşünür:

"Ancaq seçkilərdə də gördük ki, Rusiya Köçəryanı dəstəkləsə də,  pərdəarxasında Paşinyanın tərəfində idi. Rusiya üçün kimin hakimiyyətə gəlməsinin elə də əhəmiyyəti yoxdur, sadəcə onların maraqlarına xidmət edən biri olsun. Paşinyanın Rusiyanın maraqlarına xidmət edib-etməyəcəyini demək hələ ki çətindir. Dəqiq olan bir şey var ki, Ermənistanda seçkilər bitib, Paşinyan qələbə qazanıb və Köçəryan gec-tez bu məğlubiyyətlə barışmalı, ən azı parlamentdə ona verilən yerlərlə kifayətlənməlidir”.
 
Günay Rəsulqızı
 

OXŞAR XƏBƏRLƏR