“Avropa İttifaqında ciddi fikir ayrılığı yaranıb” - Politoloq

Sfera.az-ın məlumatına görə, bunu politoloq Məhəmməd Əsədullazadə deyib.  O bildirib ki, bu problemlərin növbəti böhranı yaratması istisna deyil:

"ABŞ prezindenti Co Baydenin Avropa turnesi məhz Avropa ölkələri ilə Vaşinqton arasında münasibətlərin qaydaya salınması və müttəfiq münasibətlərin yeni keyfiyyətə qaldırmasına hesablanıb. Çünki yeni çağırışlar formalaşır və yeni dünya nizamında Rusiya və Çin ABŞ-a qarşı cəbhə formalaşdırır,  Avropa İttifaqı ilə əməkdaşlığı inkişaf etdirib, parçalamağa çalışırlar. Baydenin siyasəti Rusiyaya qarşı vahid cəbhədə birləşməklə, Çinə qarşıda yeni strateji xətt ortaya qoymaqdır.  O,  bu səfərlə bir sıra strateji planına nail oldu. Amma problemlər qalır və Avropa İttifaqı yenidən "soyuq müharibə" mərhələsinə keçməkdə israrlı deyil. Burada Almaniya və Fransa rəhbərliyinin rolu daha da qabarıq görünür”.

"Beynəlxalq siyasi münasibətlərdə böhranlı vəziyyət davam edir və ABŞ Avropa İttifaqı ilə birgə Rusiyanın Avropaya qarşı kiber və hərbi təzyiqlərinin qarşısını almaq üçün Şərqi Avropada mövqelərini gücləndirir. Həmçinin Qara dənizdə ABŞ-Ukrayna hərbi təlimləri keçirilir. Demək olar ki, bu prosesdə Böyük Britaniya da yer alır. Ötən gün Qara dənizdə Rusiya gəmilərindən İngiltərə gəmisinə açılan atəş məhz bu böhranın göstəricisidir. Davam etməkdə olan böhranın mütləq bir müharibəyə gətirib çıxarmaq riski var.

 

Cənubi Qafqazda Qarabağ müharibəsinin başlanması,  davam edən beynəlxalq böhran fonunun nəticəsi idi. Bu münaqişənin qalibiyyətlə və beynəlxalq hüquq çərçivəsində sona çatması, Şərqi Avropada Rusiya təhlükəsinə qarşı yeni bir mərhələnin başlanmasına gətirib çıxardı. Bu müharibə başlanğıc olaraq Şərqi Avropada növbəti müharibənin başlanmasına gətirib çıxaracaq. Əgər, Donbas münaqişəsi başlayacaqsa, Ukrayna öz ərazi bütövlüyü çərçivəsində müharibəni həll edəcək”.

M.Əsədullazadə son olaraq bildirib ki, Qərblə Rusiya arasında davam edən hazırkı böhran Azərbaycanın mövqelərini gücləndirir: "Regionda yeni bir sülh prosesinin başlanmasına rəvac verir. Hər üç Cənubi Qafqaz ölkəsi Avropa ilə əməkdaşlığı yeni mərhələyə qaldıra biləcəklərsə, regionda sülh və əməkdaşlıq formatı yaradılacaq. Azərbaycanla Avropa İttifaqı və NATO arasında yeni bir əməkdaşlıq formatı yaradılır. İki təşkilatla Azərbaycan əlaqələri inkişaf etdirməli və siyasi dəstəyini almalıdır”.