Fermerlər taxıl sahələrini niyə yandırır? – Ekspertdən “bu, yanlış praktikadır” çağırışı

 

Maraqlıdır, taxıl sahələrinin yanması nə ilə əlaqəlidir?

Kənd təsərrüfatı mütəxəssisi, fəlsəfə elmləri doktoru Qadir Bayramlı Sfera.az-a açıqlamasında deyib ki, Azərbaycanda fermerlər adətən biçindən sonra əkin yerlərini yandırırlar və bu, geniş yayılmış praktikadır:

"Amma bu yanlış addımdır. Ola bilsin ki, məhsuldarlıq olduqca aşağıdır, fermerlər gəlir əldə edə bilməyəcəyini anlayandan sonra sahəni yandırmağa üstünük verirlər. Çox zaman insanlar əkirlər, olduqca seyrək bitdikdə və məhsuldarlığın zəif olacağı anlaşılandan sonra onu ot yeri kimi biçirlər. Yaxud biçin prosesindən sonra eyni səbəbdən sahələri yandırırlar. Lakin biçindən sonra belə əkin yerlərinin yandırılması yanlışdır. Əksər hallarda yerdə qalan saman, küləşi yandırırlar ki, orda olan zərərli mikroorqanizmləri məhv etsinlər. Halbuki yanğın zamanı zərərli mikroorqanizmlərlə bərabər, faydalı olanlar da yanır. Onların isə torpaqların məhsuldarlığının müəyyən səviyyədə saxlanılması istiqamətində böyük funksiyası var”.

 

Ekspert deyir ki, bu, zaman-zaman gündəmə gəlsə də, müəyyən bölgələrdə bu praktikadan yenə istifadə olunur:

 

"Bunun yerinə daha səmərəli aqrotexniki tədbirlər görmək olar. Bütün bunlar onu göstərir ki, bizim kənd təsərrüfatına yanaşma tərzimiz dəyişməlidir. Bölgələrdə fermerlərin problemləri ilə yerindəcə görüşüb tanış olmaq, onların fikirlərini öyrənmək, araşdırmaq və kömək etmək lazımdır. Uzunmüddətli az faizli kreditlərlə, digər imtiyazlar, təşviqlərlə, aqrosığortanın tətbiqi ilə bu cür məsələlər həll edilsə, problemlər gündəmə gəlməyəcək”.

 

Günay Rəsulqızı