Azərbaycanın qeyri neft-qaz məhsullarının ixrac dəyəri ilk dəfə 2 milyard dollar həddini ötəcək
İqtisadiyyat
11:37 / 16.06.2021
2015
Bu ilin yanvar-mayında Azərbaycanın qeyri neft-qaz məhsulları üzrə ixracı 907,6 milyon dollara yüksəlib.
Sfera.az rəsmi məlumatlara istinadən xəbər verir ki, ilk 5 ayda ixrac ötən ilin eyni dövründəki göstərici ilə müqayisədə 186,1 milyon dollar və ya 25,8 faiz çoxdur. 2020-ci ilin 5 ayında qeyri neft-qaz ixracının həcmi 721,5 milyon dollar idi.
Qeyri neft-qaz ixracındakı artım sürəti ümumi ixracdakı artım sürətini qabaqlayır. Buna görə də 2021-ci ilin yanvar-may dövründə cəmi ixracın 10,35 faizi qeyri neft-qaz məhsullarının ixracından ibarət olduğu halda, bu ilin eyni dövründə ixracdakı pay 12,22 faizə yüksəlib.
Azərbaycanın qeyri neft-qaz ixracında ən böyük paya meyvə-tərəvəz (206,17 milyon dollar), plastmassa və onlardan hazırlanan məmulatlar (143 milyon dollar), pambıq lifi və ipliyi (127,2 milyon dollar) sahibdir. Adıçəkilən məhsul qrupları üzrə ixrac ümumi ixracın 52,5 faizini formalaşdırıb.
Qeyri neft-qaz məhsullarının ixracında daha çox artım plastmassa və onlardan hazırlanan məmulatların və pambığın satışında müşahidə olunub. Plastmassa və onlardan hazırlanan məmulatların satış dəyəri 68 milyon dollar, pambığın satış dəyəri 68,5 milyon dollar artıb.
Adıçəkilən məhsullarla yanaşı metalların ixracında da ciddi artım var. Qara metalların ixracı 20 milyon dollar, alüminium ixracı 27 milyon dollar artıb.
Meyvə-tərəvəzin ixrac dəyəri azalıb. Ötən il meyvə-tərəvəz ixracının dəyəri 236,5 milyon dollar idi. Meyvə-tərəvəz ixracında 30 milyon dollar azalma qeydə alınıb. Mövcud artım dinamikası qorunarsa, Azərbaycanın qeyri neft-qaz məhsullarının ixrac dəyəri ilk dəfə olaraq 2 milyard dollar həddini ötəcək.
Vasif
Sfera.az
