Qaz sızması bir ailəni evsiz qoydu - VİDEO - FOTO

Sfera.az Kəpəz TV-yə (Region TV) istinadən xəbər verir ki, Gəncə şəhərində fərdi evdə baş verən partlayış güclü yanğına səbəb olub. Hadisə şəhərin Şah İsmayıl Xətai prospekti, 2-ci dalan, 2 nömrəli evdə qeydə alınıb. Gəncə sakini, 55 yaşlı Amil Tağıyevə məxsus, ümumi sahəsi 120 kv.metr olan ev yanıb. Yanğın zamanı ev sahibi tüstüdən zəhərlənib.

 

Samir Əliyev - qonşu: "Gəldim, dedilər ki, oğlu Amil içəridə qalıb, pəncərədən girdim oğlunu çıxardıq. Çıxardıq, hamama saldıq, su vurduq, ondan sonra özünə gəldi. Sonra yerə uzatdıq, bir az üzünə su vurduq, ayazıdı".

 

Hadisə yerinə Gəncə Şəhər Dövlət Yanğından Mühafizə Hissəsinin 4 yanğınsöndürən maşını və 30-a yaxın canlı qüvvəsi cəlb edilib. Bir aynabənd, bir mətbəx və iki otaqdan ibarət evin bir otağından başqa digər otaqlar əşyaları ilə birlikdə, həmçinin dam örtüyü tamamilə yanıb. Alovun ətraf tikililərə keçməsinin qarşısı alınıb. Rahib Nadirov- Gəncə şəhər DYMİ-nin rəis müavini: "Yanğınsöndürənlər gələndə evin çardağı tam alov içərisindəydi. Yanğın iki otaq, bir mətbəxi əhatə etmişdi, hardasa 120 kv.metrlik otaq əşyalarla bir yerdə xilas olunmuşdu. Yanğında xəsarət alan yoxdur, dəyən ziyan və yanğının səbəbi aydınlaşdırılır".

 

Partlayışın qaz sızması səbəbindən baş verdiyi ehtimal olunur.

 

Faktla bağlı araşdırmalar davam edir.