Prezident şeiri səhv oxudu, ölkə qarışdı: "Onlar meşədən gəlib..."
Dünya
16:45 / 10.06.2021
1654
Argentina Prezidenti Alberto Fernandez ölkədə rəsmi səfərdə olan İspaniya Baş naziri Pedro Sançes və ispaniyalı iş adamlarının qatıldığı tədbirdə Nobel mükafatçısı olan meksikalı şair Oktavio Pazın şeirini səhv oxuyub.
Sfera.az xəbər verir ki, Alberto Fernandezin şeirin sözlərini qarışdıraraq "Meksikalılar yerlilərdən, braziliyalılar meşədən, amma biz argentinalılar Avropadakı gəmilərdən gəlmişik", deməsi braziliyalıların sərt reaksiyasına səbəb olub.
Ona meksikalı və argentinalı bir çox siyasət nümayəndəsindən reaksiyalar gəlib.
Prezident yol verdiyi səhvə görə sosial media hesabında üzr istəyib.
1990-cı ildə ədəbiyyat üzrə Nobel mükafatına layiq görülən Oktavio Pazın şeirində Fernandezin qeyd etmək istədiyi hissə bu formada olub:
"Meksikalılar Asteklərdən, perulular yerlilərdən, argentinalılar gəmilərdən gəlir”.
Alberto Fernandez tvitter hesabında etdiyi açıqlamada 20-ci əsrdə ölkəsinə olunmuş köçü xatırladaraq, "Heç kəsə zərər vermək istəmədim, amma kim inciyirsə, əvvəlcədən üzr istəyirəm", - deyə qeyd edib.
Braziliya Prezidenti Jair Bolsonaro isə yerli sakinlərlə çəkdirdiyi fotonu tvitter hesabında "Meşə!" başlığı ilə paylaşıb.
Əzizə Zeynal
Sfera.az
