Türkiyədə yaşamaq hüququ əldə edən azərbaycanlıların sayı kəskin artıb - SƏBƏB
11:23 / 07.06.2021
1662
Türkiyədə rəsmi yaşayış icazəsi (oturum izni) ilə yaşayan əcnəbilər arasında ən böyük çoxluq İraq, Türkmənistan, İran və Özbəkistandan sonra Azərbaycan vətəndaşlarına məxsusdur. Hazırda Türkiyədə oturum izni ilə yaşayan azərbaycanlıların sayı 56 438 nəfərdir. 2015-ci ildə bu rəqəm 32 min olub. Yəni, 5 ilə 24 minə yaxın artım qeydə alınıb.
Sfera.az xəbər verir ki, bu haqda iqtisadçı Fərid Mehralızadə məlumat paylaşıb. O Türkiyənin miqrasiya qurumunun hesabatına istinadən bildirib ki, hazırda Türkiyədə oturum izni ilə yaşayan əcnəbilərin sayı 1,1 milyon nəfərdir:
"Bu saya Suriyalı qaçqınlar daxil deyil. Son 10 ildə Türkiyədə yaşayan əcnəbilərin sayı 10 dəfə artıb.
Türkiyədə oturum izni ilə yaşayan 56 mindən çox azərbaycanlının 10 356 nəfəri tələbədir. Bu o deməkdir ki, Türkiyədə təhsil alan hər 9 əcnəbi tələbədən biri azərbaycanlıdır. Azərbaycanlılar tələbə sayına görə Türkmənistandan sonra ikinci yeri tutur. Azərbaycanın lider olduğu oturum izni növü isə ailələr üçün nəzərdə tutulan yaşayış icazəsidir. Bu tip oturum izni Türkiyə vətəndaşı ilə evlənənlərə və ya Türkiyədə rəsmi yaşayış icazəsi olan birinin ailə üzvünə verilir.
Azərbaycanlılardan sonra ən çox ailə oturum icazəsi verilən ölkə vətəndaşları Rusiya və Ukraynadandır”.
F.Mehralızadə deyir ki, Türkiyə Statistika Komitəsinin məlumatına görə, 2020-ci ildə Türkiyə vətəndaşı olan kişilər xarici ölkə vətəndaşı olan 19 min əcnəbi qadınla evlənib. Onlardan iki minə yaxını azərbaycanlı olub. Azərbaycanlılar bu göstəriciyə görə sadəcə suriyalılardan geri qalıb.
Vasif
Sfera.az
