“Qarabağda işlək yollar kamera nəzarəti altında olmalıdır” – Mina təhlükəsindən necə qorunmalı?
17:38 / 04.06.2021
3221
Bu gün ikisi media əməkdaşı olmaqla 3 vətəndaşımız Kəlbəcər
rayonunda xidməti vəzifələrini yerinə yetirərkən minaya düşərək həlak olublar. Hadisə
nəticəsində digər 4 nəfər isə müxtəlif dərəcəli bədən xəsarətləri alaraq xəstəxanaya
yerləşdirilib.
Maraqlıdır, bu cür faciənin yenidən yaşanmamamsı üçün
hansı addımlar atılmalıdır? Partlayışa qurban olmamamaq üçün həll yolu varmı?
Məsələ ilə bağlı Sfera.az-a danışan hərbi ekspert İbrahim
Rüstəmli faciələrin yaşanmaması üçün lazımi addımların atılmalı olduğunu
bildirib. Ekspert eyni zamanda mina partlayışının təxribat xarakterli olduğunu
qeyd edib: "Revanşist qüvvələr ayrı-ayrı dəstələr
şəklində təxribatlar törədir. Ona görə də mina partlayışları nəticəsində can
itkisinin olmaması məqsədilə önləyici tədbirlərə nəzarət güclənməlidir. Media
nümayəndələri işğaldan azad olunmuş təhlükəli ərazilərə buraxılmamalıdır. Xüsusilə
işlək yolları əhatə edən ərazilər nəzarətdə saxlanılmalı, o hissələrdə patrul hərəkət
etməli, kamera müşayiəti olmalıdır".
Ekspert istehkamçıları indiki məqamda xüsusilə diqqətli
olmağa çağırıb: "İstehkamçılarımız bu yollarda mütəmadi olaraq
axtarışlar aparmalıdır. Bu cür məqamlarda onların üzərinə ağır iş düşür.
Bilirik ki, onların işi risklidir. Lakin onların işinə layiqli münasibət göstərməməsi
belə faciə ilə nəticələnir. Hərbi hissə komandirləri, əlaqəli hüquq mühafizə
orqanaları öz işlərini daha aktiv fazada qurmalıdır. Minanın quraşdırılması günlər
alan məsələ deyil, bu proses qısa zaman alır. Yəni, bu gün yoxlanılmış əraziyə
səhəri gün mina yerləşdirilə bilər. Hansısa ərazi üzrə tam əminlik faciənin
yaşanmasına səbəb ola bilir. İndiki məqamda belə hadisələrdən dolayı hər
birimiz məsuliyyət daşıyırıq".
Sfera.az
