Rusiya dollardan imtina edir
İqtisadiyyat
15:53 / 03.06.2021
2333
Rusiya suveren Sərvət Fondunun dollarda olan aktivlərini avro, yuan və qızıla dəyişdirəcək.
Sfera.az "Bloomberg” saytına istinadən xəbər verir ki, bu haqda Rusiyanın maliyyə naziri Anton Siluanov açıqlama verib.
Nazir deyib ki, belə bir addımın atılmasında məqsəd mümkün sanksiyalara qarşı riski azaltmaqdır. Bu transferdən sonra 119 milyard dollar dəyərində olan likvid vəsait mərkəzi banka transfer olunacaq.
Hazırda Fondun aktivlərinin 35 faizi dollarda saxlanılır. Bu qədər aktivin dəyəri 41,5 milyard dollardır. Likvid olmayan aktivlər də nəzərə alınarsa, dollarla olan vəsaitlərin həcmi 185,9 milyard dollar təşkil edir.
Siluanov söyləyib ki, valyuta dəyişikliyini sürətli həyata keçirə bilərlər. Nazirin məlumatına görə, dəyişikliyin ardından Fondun aktivlərinin 40 faizi avroda, 30 faizi yuanda, 20 faizi qızılda, 5 faizi yendə və daha 5 faizi funt sterlinqdə olacaq.
Ekspertlər valyuta dəyişiminin birjalarda necə təsir yaradacağını proqnozlaşdırmaqda çətinlik çəkir.
Xatırladaq ki, ABŞ və Avropa İttifaqından gələn sanksiyalardan sonra Rusiya Mərkəzi Bankı da son bir neçə ildə balansında olan dollar aktivlərini tədricən azaldır.
Vasif
Sfera.az
