\"Türkiyədə təhsil almış gənclərin diplomlarının tanıdılması məsələsi həll edilib\" - Ekspert yeni qərardan DANIŞDI
14:09 / 02.06.2021
2382
Türkiyənin milli təhsil naziri Ziya Selçuk Azərbaycan
və Türkiyənin ali məktəb diplomlarının qarşılıqlı olaraq tanınması ilə bağlı məsələyə
münasibət bildirib. Z.Selçuk deyib ki, tədris ilinin müddəti baxımından iki ölkənin
diplomlarının ekvivalenti ilə bağlı bəzi uyğunsuzluqlar var və diplomların
ekvivalenti ilə bağlı bəzi razılaşmalar əldə etmişik.
Maraqlıdır, görəsən minlərlə
gəncin diplomlarının tanıdılması üçün bu açıqlama ümidverici ola bilərmi? Nazir, razılaşmalar dedikdə
nəyi nəzərdə tutub?
Məsələ ətrafında Sfera.az-a danışan təhsil eksperti
Kamran Əsədov hazırda ən böyük problemin Türkiyənin distant təhsil verən
universitetlərin diplomalarının Azərbaycanda tanınmaması ilə bağlı olduğunu
bildirib:
"İlk
növbədə qeyd edim ki, hazırda azərbaycanlı gənclərin xarici ölkələrə təhsil
almağa getmək istiqamətində ən böyük seçimləri qardaş Türkiyədir. Lakin burada
müəyyən problemlər də ortaya çıxır. Birincisi Azərbaycanın üç universitetinin
diplomu qardaş Türkiyənin Ali Təhsil Şurası (YÖK - Yükseköğretim Kurulu) tərəfindən
tanınmır. Həmin universitetlərin tələbələri Türkiyədə magistratura təhsillərini
davam etdirə bilmirlər. İkinci problem isə Azərbaycan Respublikasının Təhsil
Nazirliyinin Türkiyədə distant təhsil alan şəxslərin diplomlarını tanımaması ilə
bağlıdır. Hazırda Türkiyədə qiyabi təhsil yoxdur, distant təhsil var. Distant təhsil
alan şəxslərin də diplomları Azərbaycanda çox təəssüflər olsun ki, tanınmır".
"Türkiyənin təhsil naziri Ziya Selcuk Azərbaycanda
olarkən məhz qarşılıqlı tanınma dedikdə, xüsusən distant təhsil məsələsi və bəzi
ali təhsil müəssisələrinin diplomlarının Türkiyədə tanınmaması problemlərinin
aradan qaldırılması məsələsini nəzərdə tutub və bu istiqamətdə problemlər həll
edilib. Digər tərəfdən Azərbaycanın tibb təhsili ilə bağlı problemlər mövcuddur.
Azərbaycanın tibbi ixtisası üzrə məzunları Türkiyədə "uzmanlıq” oxumaqla bağlı
problem yaşayırlar. Ümumiyyətlə xarici diplomlarla bağlı ən yüksək diplom tanıma
faizi Türkiyənin payına düşür.
Bizim Türkiyə ilə bağlı ən böyük problemimiz kollec
məzunları ilə bağlıdır.
Çox təəssüf ki Azərbaycanda 2011-ci ildən sonra
kollec bitirən və subbakalavr statusu alan şəxslər Türkiyədə təhsillərini davam
etdirə bilmirlər. Bu da Azərbaycanda hər il 2 mindən çox şəxsin Türkiyədə təhsilini
davam etdirməsinə mane olur. Digər tərəfdən Azərbaycanda həmin şəxslərə
attestat verilmədiyi üçün həmin şəxslərin təhsil alması ilə bağlı problemlər mövcuddur.
Hesab edirəm ki, biz mütləq şəkildə Azərbaycanın kollec məzunlarının Türkiyədə
diplomlarının tanınması məsələsini həll etməliyik".
Əzizə Zeynal
Sfera.az