\"Azərbaycanda təhsil müəssisələrinə \"halal internet\" verilir - Ekspert
14:07 / 02.06.2021
2437
"Azərbaycanda məktəblərə və evlərə verilən internet kəskin fərqlidir. Bütün təhsil müəssisələrinə verilən internet "halal internet"dir, yəni təhsil üçün olan trafik süzgəcdən keçirilir”.
Sfera.az-ın məlumatına görə, bunu Azərbaycan İnternet Forumunun rəhbəri Osman Gündüz deyib. O bildirib ki, bu trafikdə uşaqlar üçün zərərli ola biləcək infromasiyalar minimuma endirilib.
Ekspert uşaqları internetdəki zərərli informasiyalardan qorumaq yolundan söz açıb:
"2019-cu ildə Telekommunikasiya haqqında qanuna "Uşaqların zərərli informasiyalardan qorunması haqqında” qanunun tətbiqi ilə bağlı dəyişiklik edilib və abunəçilərin hüququ ilə bağlı yeni bənd əlavə edilib: "34.1.2-1. uşaqların zərərli informasiyadan qorunması üçün texniki proqram və avadanlıq vasitələrinin tətbiqi ilə müvafiq tədbirlər görülməsini tələb etmək”. Yəni anlaşıqlı desək, əgər evdə azyaşlı uşaq varsa, valideyn provayderdən " halal internet" xidməti tələb edə bilər”.
O.Gündüzün sözlərinə görə, müəyyən işlərin görülməsinə rəğmən, ötən ildən qüvvədə olan "Uşaqların zərərli informasiyalardan qorunması haqqında” qanunun tələblərinin icrası istiqamətində atılan addımlar yetərli deyil.
Günay Rəsulqızı
Sfera.az