Rusiya Türkiyədən pomidor idxalı kvotasını artırdı, Azərbaycan 31 milyon dollar itirdi
11:23 / 01.06.2021
1758
Rusiyanın Azərbaycandan pomidor idxalını azaltmasının səbəbləri bəlli olur. Şimal qonşumuz Türkiyəyə daha böyük miqdarda pomidor ixracına imkan yaradır ki, bu da digər ölkələrdən pomidor alışını azaldır.
Yeni qərara əsasən Rusiya Türkiyədən pomidorun idxalının həcminə tətbiq etdiyi illik kvotanı daha 50 min ton və ya 20 % artıraraq 250 min tondan 300 min tona çatdırıb.
Sfera.az xatırladır ki, Rusiya 2015-ci ildə iki ölkə arasında yaranmış siyasi böhrandan sonra Türkiyə pomidoruna qarşı embarqo tətbiq etmişdi. 2017-ci ildə embarqo götürülsə də, 100 min tonluq kvota tətbiq edilmiş, sonradan bu rəqəm 200 min tona, ötən ilin dekabr ayında isə 250 min tona çatdırılmışdı.
Türkiyəyə qarşı sanksiyanın tətbiq edilməsinin ardınca Azərbaycanın Rusiyaya pomidor ixracı kəskin artmışdı. Amma Türkiyə ilə münasibətlər normallaşdığından pomidor idxalı yenidən artır və bu, digər ölkələrdən idxalın azalmasına gətirib çıxarır.
2021-ci ilin yanvar-aprel aylarında Azərbaycan Rusiyaya 36,7 min ton pomidor satıb. 2020-ci ilin yanvar-aprel aylarında ixracın miqdarı 59 min ton idi. Ötən illə müqayisədə pomidor ixracının miqdarı 62,2 faiz və ya 22,3 min ton azalıb. Miqdarın azalması dəyər ifadəsində də azalmaya səbəb olub. Bu ilin ilk 4 ayında 42,3 milyon dollarlıq pomidor satılıb ki, bu da 31 milyon dollar azalmadır.
Vasif
Sfera.az
