Bu ölkədə istirahət etmək azərbaycanlılar üçün indi daha sərfəli oldu
11:58 / 31.05.2021
1908
Ötən həftə Türkiyənin milli valyutası olan lirə ilə dolların məzənnəsində yeni antirekord qeydə alınıb. Dollar/lirə kursu mayın 28-də 8,57 həddini ötüb ki, bu da 2020-ci ilin noyabrın 6-da qeydə alınan məzənnədən (8,52) daha yüksəkdir.
Sfera.az xatırladır ki, lirə 2021-ci ilin fevralın 20-dən sonra yenidən ucuzlaşır. Həmin tarixdə dollar/lirə məzənnəsi 6,95 idi və ötən müddətdə lirə 17 faiz ucuzlaşıb.
Lirənin ucuzlaşması Türkiyənin cari əməliyyatlar balansında olan kəsirin böyüməsi ilə bağlıdır. Adətən aprel-may ayları ərzində Türkiyə turist səfərləri ilə bağlı xeyli sayda sifariş və böyük məbləğdə öncədən ödənişlər əldə edirdi. Daxil olan vəsaitlər hesabına cari əməliyyatlar kəsiri kiçilirdi. Amma bu il turist səfərləri ilə bağlı sifarişlər xeyli azalıb.
Lirənin dəyər itirməsi Türkiyədən mal alan və bu ölkənin xidmətlərindən istifadə edən ölkələrin vətəndaşları üçün əlverişlidir. Lirənin bu dərəcədə ucuzlaşmasından sonra qardaş ölkədən mal almaq ucuz başa gələcək, eyni zamanda Türkiyəyə səfər etmək, istirahət etmək sərfəli olacaq.
Bu baxımdan Azərbaycan üçün də münasib vəziyyət formalaşıb. Artıq ölkəmizdə manat/lirə məzənnəsi 19 qəpiyə düşüb ki, bu da ən aşağı səviyyədir. Belə vəziyyətdə yəqin ki, Türkiyədən Azərbaycana ixrac artacaq və vətəndaşlarımız qardaş ölkəyə daha çox turist səfərinə gedəcək.
Vasif
Sfera.az
