Bank aktivlərinin 44,6 faizi kreditlərdən ibarətdir
İqtisadiyyat
17:00 / 27.05.2021
1996
2021-ci ilin mayın 1-nə olan məlumata əsasən, bankların cəmi aktivləri 32,796 milyard manat, cəmi öhdəlikləri 28,065 milyard manat, kapitalı 4,731 milyard manat olub.
Sfera.az Mərkəzi Banka istinadən xəbər verir ki, bankların aktivləri 0,8% və ya 275,3 milyon manat artıb. Aktivlərin 44,6%-i kredit portfelindən ibarətdir. Bankların kredit portfeli apreldə 1,8% (259,5 milyon manat) artaraq 14,612 milyard manat təşkil edib.
Cəmi kredit qoyuluşunun (BOKT-lar daxil olmaqla) 6,1%-ni vaxtı keçmiş kreditlər təşkil edir. Vaxtı keçmiş kreditlərin cəmi kredit portfelində payı ötən ilin müvafiq dövrünə nisbətən 2% bəndi, 2020-ci ilin orta illik göstəricisinə nisbətən 1,3% bəndi azalıb.
Apreldə bank sektorunun cəmi öhdəlikləri 1,4% və ya 393,5 milyon manat artıb. Cəmi öhdəliklərin 76,1%-ni depozit portfeli (maliyyə institutlarının depozitləri çıxılmaqla) təşkil edib. Fiziki şəxslərin əmanətləri (sahibkarlıqla məşğul olan fiziki şəxslərin depozitləri çıxılmaqla) isə 2,6% (207.2 mln. manat) artaraq 8,22 milyard manat olub.
Müddətli əmanətlərin artımı milli valyutada olan əmanətlər hesabına baş verib. Apreldə manatla əmanətlər 114,2 milyon manat və ya 4,9% artıb.
2021-ci ilin ilk 4 ayında banklar 194,7 milyon manat xalis mənfəət, 301.6 mln. manat əməliyyat mənfəəti əldə edib.
Vasif
Sfera.az
