Səhhətindəki problemlərə görə vaksin vurdura bilməyənlər COVID-19 pasportunu necə alacaq? - AÇIQLAMA
12:42 / 27.05.2021
2694
Xəbər verdiyimiz kimi iyulun 1-dən etibarən COVID-19 pasportu və ya COVID-19-a qarşı immunitet sertifikatı tələbi müəyyən edilən iş və xidmət sahələrinin işçilərinin ən azı 80 faizinin belə pasporta və ya sertifikata malik olması tələb olunacaq.
Lakin bəzi şəxslər səhhətindəki problemləri irəli sürərək vaksin vurdura bilməyəcəyini iddia edir. Digər tərəfdən onların arasında koronavirusa yoluxmayanlar da mövcuddur.
Maraqlıdır, peyvənd vurdura bilməyən və eyni zamanda virusa yoluxmayan şəxslərin COVİD-19 pasport almaq ehtimalı varmı?
Tibb üzrə ekspert Adil Qeybulla Sfera.az-a açıqlamasında deyib ki, kimlərə vaksin vurula bilər, kimlərə yox, bunu ancaq həkimlər müəyyənləşdirə bilər:
"İnsanların özü bunu həll edə bilməz. Digər tərəfdən immun sistemi formalaşmayan adama COVİD-19 pasportunun verilməsi məsələsi absuddur. Çıxış yolu ondan ibarətdir ki, antikor testləri çox ucuz edilsin. Bundan sonra insanlar testləri rahat verib immunitetlərinin formalaşıb formalaşmadığını müəyyənləşdirsinlər. İmmun sistemi formalaşan adama təbii ki, pasport verilə bilər ki, sonradan diskriminasiya olmasın”.
Müsahibimiz qeyd edib ki, hazırda vətəndaşların çoxu müxtəlif bəhanələrlə vaksinasiyadan yayınırlar:
"Onların bəhanələrinin hamısı əsassızdır. Koronavirusa yoluxub əziyyətlə dünyasını dəyişmək yaxşıdır, yoxsa vaksin olunub ondan qorunmaq? Bu iki dilemmanın qarşısında oturub düşünmək lazımdır”.
Günay Rəsulqızı
Sfera.az
