"Alpinist" oğru "Keşlə"nin idman direktorunun mənzilini də qarət edib - "Mən belə peşəkar oğru görməmişəm"
İdman
13:29 / 21.05.2021
2292
Hazırda "Keşlə"nin idman direktoru olan ötənlərin məşhur futbolçusu Ceyhun Sultanovun evini qarət edən şəxs tutulub.
Bu barədə Azərbaycan millisinin keçmiş yarımmüdafiəçisinin özü məlumat verib.
O bildirib ki, həmin şəxs ötən gün həbs edilən Cavid Süleymanovdur.
Sultanov 3 il əvvəl baş vermiş hadisə ilə əlaqədar bu gün polisə ifadə verdiyini bildirib: "Həmin Cavid Süleymanov adlı şəxs bizim mənzilə də girib. Bu gün ifadə də vermişəm. O, artıq tutulub. Sizin vasitənizlə hüquq-mühafizə orqanlarına təşəkkür edirəm. Onlar hər sahədə öz işlərini peşəkar görürlər. Bir çoxları deyirdilər ki, heç kim oğrunu tapa bilməyəcək. Lakin bizim polislərimiz həmin şəxsi yaxalamaqla, necə peşəkar olduqlarını sübut etdilər".
Sultanov ona dəyən ziyanın məbləğini açıqlamaq istəməyib: "Mənim evimdən qızıl, xəz kimi qiymətli əşyalar götürülüb. Pul götürə bilməyiblər. Məbləği desəm, bir az düzgün çıxmayacaq".
Sultanov Yasamal rayonundakı evindən oğurluq olduğunu xatırladıb: "Mən belə peşəkar oğru görməmişəm. Öz binamda eyvandan baxanda belə, qorxuram. Amma o, eyvanın fasadından necə düşübsə, peşəkar olduğuna əminəm".
