“Azərbaycan “Xarıbülbül” musiqi festivalı ilə dünyaya bu mesajları verdi” - Açıqlama
15:15 / 17.05.2021
2062
Şuşada keçirilən "Xarıbülbül” festivalını təkcə mədəni
tədbir olaraq dəyərləndirmək, Azərbaycanın mənəvi zənginliyin nümayiş etdirilməsi
kimi təqdim etmək doğru olmaz. Belə yanaşma hardasa tədbirin əhəmiyyətini nisbətən
azaltmaq demək olacaq. Bu tədbirin böyük siyasi əhəmiyyəti vardır”.
Bu sözləri Sfera.az-a açıqlamasında Şuşada keçirilən
"Xarıbülbül” festivalının əhəmiyyətindən danışarkən, Bakı Beynəlxalq
Multikulturalizm Mərkəzinin əməkdaşı Araz Qurbanov deyib. Onun sözlərinə görə,
Azərbaycan "Xarı bülbül” festivalı ilə dünyaya bir sıra mesajlar ünvanladı:
"Birinci mesaj odur ki, Azərbaycanda yaşayan bütün
xalqlar bərabərdir. Onların etnik mədəniyyətlərinin qorunması və inkişafına Azərbaycan
dövləti hər cür qayğı göstərir. Azərbaycan
Prezidentinin qeyd etdiyi kimi, Vətən müharibəsində əldə etdiyimiz qələbənin
bir səbəbi də ölkəmizdə etnik və vətəndaş birliyinin yüksək səviyyədə olması,
dövlətimizdə yaşayan bütün xalqlar və din nümayəndələrinin Vətənin azadlığı uğrunda
mübarizədə fəal iştirakıdır”.
Həmsöhbətimiz qeyd etdi ki, festival Azərbaycanda
multikulturalizm mühitinin, etnik-dini rəngarəngliyin yüksək səviyyədə olduğunu
göstərən bir tədbir idi: "Tədbir həmçinin Ermənistan və onun havadarlarına yönəlik
mesaj idi. Son 30 il ərzində bədnam qüvvələrin Azərbaycanda etnik zəmində
qarşıdurma yaratmaq səylərinin puç olduğunu, əksinə, ölkəmizdə yaşayan xalqlar
arasında birliyin, qarşılıqlı hörmətin daha da möhkəmləndiyini dünyaya göstərdi”.
A. Qurbanova görə, festivaldan irəli gələn
mesajlardan biri də Azərbaycanın öz mədəni irsini qoruması, inkişaf etdirməsindən
ibarət olub: "İşğaldan azad olunmuş ərazilərdə minlərlə tarixi abidələrimiz var
ki, onun da əsas hissəsi ermənilər tərəfindən dağıdılıb. Festival dövründə Azərbaycan
Prezidentinin Şuşada tikiləcək əzəmətli məscidin layihəsini nümayiş etdirməsi, burada
azan səsinin səslənməsi bir daha göstərdi ki, ölkəmiz Qarabağın həqiqi sahibi
kimi öz hüquqlarını orada tam bərpa edəcək”.
Rüfət SULTAN
